البدراوي عجز على توفير طائرة خاصة للرجاء من المغرب إلى تنزانيا والخضرا عندها ديبلاصمون صعيب باش تلعب مع سيمبا

غيكون الرجاء الرياضي على موعد مع ديبلاصمون صعيب إلى تنزانيا باش يلعب مع فريق سيمبا التنزاني السبت الجاي، فالجولة الثانية من ليكروب ديال عصبة أبطال إفريقيا
وعجز المكتب المديري ديال الرجاء برئاسة عزيز البدراوي على توفير طائرة خاصة تسافر بالفريق من المغرب إلى تنزانيا، باش تلعب الخضرا ضد سيمبا وترجعها إلى المغرب بسبب تكلفة الرحلة الخاصة.
وغيكون فريق الرجاء مضطر باش يسافر من الدار البيضاء الأربعاء الجاي إلى قطر فرحلة جوية عادية ومن قطر غيشد طائرة أخرى إلى تنزانيا باش يلعب مع سيمبا السبت الجاي، وملي يسالي الماتش غيدير نفس العملية فالاياب وهادشي كينضاف له عدد الساعات اللي غيبقها فمطار الدوحة فقطر كيتسنى فالطائرة والخضرا ما غترجع إلى المغرب حتى الاثنين المقبل، وكيتسناها ماتش الأربعاء مع إتحاد التواركة فالبطولة.
للإشارة فالمكاتب السابقة ديال الرجاء الرياضي والرؤساء السابقين كانوا كيحرسو دائما فالرحلات ديال الفريق إلى البلادان الإفريقية على توفير طائرة خاصة باش تنقل اللاعبين، وملي كيوفرو غير رحلة عادية أو كتكون غير مباشرة كيفما دار البدراوي هاد المرة كان كينوض عليهم الصداع واحتاج وغضب الجمهور.