"تحقيق" بدا بحي فمدريد تزاد وكبر فيه أشرف حكيمي وها شنو قال على قضية الاغتصاب اللي متهم فيها

مازال قضية اتهام الدولي المغربي أشرف حكيمي نجم باريس سان جيرمان الفرنسي فقضية اغتصاب، دايرة ضجة بفرنسا والمغرب وحتى بإسبانيا فين كتعيش العائلة ديال النجم المغربي.
صحافية بقناة "Feista" الإسبانية شافت أن الملف ديال قضية اتهام الدولي المغربي أشرف حكيمي بالاغتصاب مثير بالاهتمام وبدات كتحقق فيه، ومشات كتقلب على صحابو والعائلة ديالو اللي عايشين فإسبانيا باش تحاول من خلالهم تكشف شي حاجة فالقضية وكيفاش كيبان لهم هذا الفيلم.
ومشات الصحافية بالقناة الإسبانية سيلفيا ألامو حسب ما قالت فحوار تلفزي، لمنطقة خيتافي بالعاصمة الإسبانية مدريد فين تزاد أشرف حكيمي وكبر، وتماك التقت مع واحد من صحاب النجم المغربي حكيمي كشف لها بلي تكلم معه قبل انتشار خبر الاتهام ديالو بالاعتداء الجنسي علي الفتاة، وعاود له شنو كاين وأكد له بلي هذا فخ صاوبوه له وأنه كيحس براسو تصيد وتقولب.
الصحافية الإسبانية قالت، كذلك بلي صاحب حكيمي كشف لها أن عائلة النجم المغربي متأثرة بزاف بسبب قضية اتهامو باغتصاب فتاة، وأن المعارف ديالو اللي كبر معهم فمنطقة خيطافي واثقين بلي أشرف حكيمي ما يديرهاش وما يمكنش يرتكب هذه الجريمة، ولكن حتى حد ما عارف الحقيقة الكاملة.