المش خرى

شعر : أبوالغضب
نصرالدين خيامي بلمهدي
زجل المش خرى / زجل : أبوالغضب نصرالدين خيامي بلمهدي
هاك .. آرى
هالمش – خارة
ع الاولة .. شفارة
وتانية .. مكارة
وثالثة .. طمارة
ورابعة .. حگارة
والعاشرة .. بدات مشخارة
هاك .. آرى
هالمش – خارة
الاولة ف الولات .. وردة
وتانية ف التانيات .. ميزان
وثالثة ف الثالثات .. قنديل
ورابعة ف الرابعات .. حمار
والخمسة ف الخمسات .. جرار
والسادسة ف سادسات
بدات مخيات .. وإتارة
هاك .. آرى
هالمش – خارة
بكات العيون ضرارة
ع الواقع خسارة
ركعة ف طمارة
والعقل ف شكارة
وصباع قمارة
هالمجداف والبحارة
هاللي ركب بشطارة
هاك .. آرى
هالمش – خارة
مسرح .. وثمثيل
فلام .. وإتارة
بندير .. وطارة
وفهامة الخسارة
هاك .. آرى
هالمش – خارة
منين حنا .. وشكون ؟هما
هما ولادنا .. وحنا فتنا
ما الوم بملام .. الايم
عيب فينا يتعاب
ياللي گال : عند الدورة ندور
تحية اللرفيق
والحضور مشكور
والمشكور مدعور
هاك .. آرى
هالمش – خارة
قاش .. قاش
بوليس .. وشفارة
والغلب بوحمارة
على شيخات .. ورحبة القصارة
ثلث العدا حفارة
وثلث العدا شطارة
وقلت ترابي .. ولواط الحارة
هاك .. آرى
هالمش – خارة
شكون ضرب يديه
شكون تقب عينه
شكون سد ودنيه
تبت .. ياوا .. تبت
خلي همك وهمي ينبت
ها .. ودني
ها .. عيني
ها .. يدي
ها .. حبيبتي تشالي
وتگول : رجعات حليمة
الحرفة مها القديمة
هاك .. آرى
هالمش – خارة
شكون ؟ فسد الگاعة
شكون ؟ ميل الجماعة
شكون ؟ زگح بزولت الرضاعة
شكون ؟ حكم كانون طاعة
هذا طيش .. هذا طيش
ماليه عقل تبرهيش
هاك .. آرى
هالمش – خارة
سمع وزم ياولد المهضارة
آش كاين تم
كلام .. ولا نم
المش – خارة تم
تم .. تم .. تم
كلام الحضارة تم
تعريجة .. وصفارة
وكلام .. وترتارة
ياولد المهضارة
هاك .. آرى