الإخوان ديال العدالة و التنمية تقو الله فتازة

مقال اسبوعي يُكتب عُنوة بالدارجة المغربية
تازة، هاذ المدينة اللي كانت معروفة بالأمن و الأمان، دخلت عليها 2012 بالإحتجاجات... حتى كنقولو صافي هدنات كتولي تشعل، لاش كتعاود تشعل؟ و المصيبة ناس تحاكمت و تعتقلت و تصريحات بعض المسؤوليين بالأحزاب مشات مع الواد، ووعود حزب العدالة و التنمية تبخرات..بين هذا و هذاك و لو بيان تضامني للعدالة و التنمية مع الناس ديال تازة بعد الأحداث عكس بني بوعياش.



تازة كيفما قالوا لوالا درهم جاوي تبخرها ، فكيفاش أن رئيس الحكومة للي من حزب العدالة و التنمية كيصرح تصريح و واحد البرلماني من الحزب ديالو كيصرح العكس، فشكون نصدقوا واش رئيس الحزب و الحكومة أم برلمانيين من نفس الحزب، أم ان هذا إلا تمويه كيفما سبقنا قولنا سياسة داخ دوخ و العدالة عندها جوج وجوه.



و قبل من هاذ شي، سبق برلماني بغا يدير السياسة بالناس سواء معطلين أو ساكنة الكوشة ... و قالك غادي يلق مع ختوا البرلمانيين الجداد الحل لمشاكل تازة، و عطاوه الرئاسة، و قالوا لينا بلي مدير دار الضو آوت، الوقت كذباتهم مديري الضوء مازالين فبلاصتهم، بلا اللقاء مع رئيس الحكومة اللي خرجو منو غير بتصيورات مع بنكيران واخا أن هاذ التصاور ماكانوش يوصلوا حتى الرباط، كان يمكلهوم ياخذوها معاه غير فساحة كوليزي منين جا كيهرج.


آخر التصريحات اللي دايرة دابا حالة بمدينة تازة، هي ديال الوزير الناطق باسم الحكومة، و اللي للأسف حتى هو من العدالة و التنمية، قال بلي تازة تعطات ليها 10 مليار و موصلاتش...آواه أسيد الوزير ، حنا كنعرفوا بلادنا و الأزمة الإقتصادية اللي كيدوز بها المغرب . فمنين غادي تجي هاذ 10 ديال المليار ؟ ولاش تازة بالضبط ؟ و علاش ما تذكراتش فمشروع الميزانية اللي عرضاتوا الحكومة للتصويت بالبرلمان ؟ قولنا شكون عطاها ؟ و لمن تعطات ؟ و شكون اللي موصلهاش . واش تعطت باش تفرق على المواطنين ؟ أو باش تحاربوا بها البطالة ؟ واش باش تزيدوها فالميزانية ديال المجلس ؟

ثانيا هاذ 10 ديال المليار غالبا ما غادي تكون تعطات وراء الأحداث ديال 04 يناير ، أي ان هاذ الفلوس تعطات فعهد حكومة بنكيران ؟ ففين هي الشعارات ديالكم و منها ربط المسؤولية بالمحاسبة " اللي تعطاتلوا الفلوس يتحاسب عليها و تقولوا شكون هو أو شكون هي الجهة ؟ أولا هي ما شي لاكريمة " ، و الشفافية فالحسابات " مصدر 10 ديال المليار ".

و هنا و بما أننا مواطنين مغلوب على أمرهم ، تيقناك أسي الوزير ، وايلي زعما الوزير يكذب ما يمكنش و حنا اللي كنامنوا بلي قالها القايد هي اللي كاينة . فعشرة ديال المليار غادي تكون واقيلا تعطات للعامل بصفتوا الآمر بالصرف، أو المجلس البلدي إلا كانت غادي تكون لدعم الميزانية، إذن واحد فيهم ماوصلش الفلوس ، فإما ديروا بيان تكذبوا فيه هاذ التصريح أو بينوا فين درتوا الفلوس ؟ قبل ما شي صباح يخرجنا وزير الخارجية و اللي بالمناسبة حتى هو من العدالة و التنمية و يصرح" بما ان الناس ديال تازة مقهورين ، راحنا دارنا لمدينة تازة الروايض باش نديوها للميريكان و لكن شي حد فش الروايض "، و نبداو حنا نقلبوا على شكون فشوهم .