المجلس ديال تازة، خلال دورة فبراير العادية ديالو، صادق على تصميم التهيئة الخاص بالمنطقة الشرقية للمدينة.
هاذ النقطة دازت بإجماع الحاضرين، و منين كانقولو الحاضرين، أول شيء كنسولو عليه هو العدد ديالهم، اللي متجاوزش 19 من أصل 39 و بالتالي علاش انساحبو الأعضاء الآخرين بمن فيهم الرئيس.
ثاني حاجة، شكون هما هاذ الحاضرين؟ كاين فيهم الناس ديال المعارضة، و اللي بقدرة قادر، بدلوا الرأي ديالهم بمقاطعة دورات المجلس حتى يبان الخيط الأبيض من الكحل فقضية رئيس المجلس البلدي، و حضروا لدورة فبراير و صوتوا مع تصميم التهيئة، زائد فريق العدالة و التنمية اللي الفريق الوحيد اللي بقى مكمول العدد حتى نهاية أشغال الجلسة الولى من دورة فبراير رغم أن نقطة الحساب الإداري اللي معولين يقوقو عليها تأجلت، واش هو الإلتزام اللي فعنقهم إتجاه الساكنة ام كانوا بدورهم كيتسناو هاذ النقطة حيت عاندهوم فيها الربحة أي هناك لمستفيد منها.
ثالثا ، أشنو هي هاذ النقطة ؟ و هي توسيع تازة من الناحية العمرانية من الجهة الشرقية ، باش يغطيو كيفما قالوا الناس ديال الوكالة الحضرية، حاجية السكن بمدينة تازة في افق 2030 و اللي غادي توصل الحاجية ديالنا فيها ما يقارب 21400 سكن .
إذن فين كاين المشكل ؟ رغم أن هاذ النقطة غادي يستفد منها حوالي 35 ودادية سكنية من الناس ذويي الدخل المحدود و المتوسط، إلا أن مجموع الأراضي تقريبا ديال هاذ الوداديات كيساوي تقريبا نفس المساحة من مجموع 5 أو 6 ديال المنهشين العقارين و ليعاد كيتعلمو النهش.
زائد أن واحد الأرض مساحتها حوالي 36 هكتار مازال متصفاتش الله و أعلم، حيث المجلس البلدي كان فواحد الدورة سنة 2008 خذا قرار نزع الملكية من أجل المصلحة العامة، و تكلف بالملف واحد السيد من الحزب اللي باغي يقوق على المال العام فالحساب الإدار ، لذلك كنسولوه ، فين وصلات مسطرة نزع الملكية اللي ربما مدارتش أصلا ، لأنه حسب معرفة المتواضعة بالقانون أن قرار نزع الملكية اللي كيدوز فدورة للمصادقة، خاصو دورة جديدة للمصادقة على التنازل على القرار الأول فحالة إلا المجلس قرر يتنازل على الدعوى، خصوصا أنه ضمنيا فهمنا أنه تمت الترضية باش المجلس يدير عين ميكة على هاذ الأرض منين نفس السيد من نفس الحزب برم معاه عقد أولي للبيع ديال واحد المساحة من ذيك الأرض لمشروع سوق السمك بقيمة 150 درهم للمتر.
و هاذا اللي كيحيلنا على عضو آخر من نفس الحزب صوت ضد مشروع سوق السمك اللي غادي يخدم تقريبا 200 واحد ، بمبرر ان الأرض مازال غادي يجري عليها مسطرة نزع الملكية، و اليوم كنتفاجئوا بيه صوت مع مشروع تصميم التهيئة ، واخا مازال ذيك الأرض ما بان الخيط ديالها فين ماشا.
أما الناشط الفايسبوكي، فحدث و لا حرج فضح المتتبع بعابارة "حنا منين كنا فالتسيير..."، و تقبلنا الوذنين بصداع المال العام، و خاص المفسدين يتحاسبو على التسيب اللي كيعيشوا المجلس و فالأخير، كلقاوه حتى هو تحمل عناء البقاء حتى الليل باش يصوت مع تصميم التهيئة، واش زعما غير من حيث فيها الأرض ديال الزعيم ديالو.
رجعوا لذيك التصميم براسو، واش الأعضاء حترموه كيفما جابتوا الوكالة الحضرية، ام أن تصفية الخواطر كانت حاضرة ، باش يدوز و بالتالي بدل الطريق من هاذ الجهة، و نقص من ذيك المساحة راني ضايع فيها، إلا بغيتي نصوت معاك، و زيد وزيد .
زايدون السيد اللي تكلم على خاص الناس اللي غادي تستفد من تصميم التهئية خاصهوم يديرو إلتزام باش ما يطالبوش المجلس بالتعويض على المساحات اللي غادي تاخذ منهم من أجل المصلحة العامة إما باش يديرو طريق او شي مؤسسة ...) غادي نقولولو فين كونتي نهار اللي فتحتو الطريق لواحد العضو معاكم فالأغلبية للتجزئة ديالو مور الجرادمية، و دابا سمعنا انه ربما كيطالب بتعويض ما بين 600 مليون و مليار و شي .
إذن الله يجازيكم بالخير ، تحملوا مسؤولسيتكم و خطيونا من سياسة داخ دوخ سواء بالأغلبية أو المعارضة، راه المواطن عاق وفاق بكوم، و خرج من تحت الوصاية ديالكم . باش بلا ما نقولو ليكم سياستكم فيها الأو O و ما كاين لا تغيير لا والو لا عاند صحاب اللحي و لا للماعندوشاي.
