اختار إلياس العماري، الأمين العام لحزب الأصالة والمعاصرة، لغة "الطنز" والسخرية للتعليق على تنصيب حكومة العثماني، وقال إلياس: "الحكومة كيبانو فيها تقريبا نفس الوجوه اللي الشعب المغربي مولف كايشوفها في الحكومات السابقة". وتابع العماري في تدوينة له على الفايسبوك: "وأنا كنرجع للتواصل مع الأصدقاء والمتتبعين للصفحة ديالي، لقيت كولشي كيهدر على التشكيلة الحكومية الجديدة. وتفكرت حكومة 1992، وجات لي فلبال الصورة ديال المعارضة فديك الوقت وهي كتقرا الفاتحة على الحكومة ديال السي محمد كريم العمراني". مضيفاً: "وأنا حاير اليوم، واش نقراو على حكومة السيد رئيس الحكومة الجديد سورة الفاتحة أو شي آية أخرى. و بانلي ماغنلقاوش أحسن من آية الكرسي لعل وعسى تقضى حوائج بلادنا على يد هاذ الحكومة، ولكن واش غتنفع هاذ القراءة مع حكومة كيبانو فيها تقريبا نفس الوجوه اللي الشعب المغربي مولف كايشوفها في الحكومات السابقة". وتعجب إلياس العماري قائلاً: "الغريب في الأمر هو أن كثار من 6 شهور، بل من نهار فاش تشكلات الحكومة الأولى ديال سي عبد الاله بنكيران، ما بقينا كنسمعو الهدرة إلا على شكون الأحزاب اللي غاتاخذ الحقائب الوزارية، وشكون السميات اللي غايكون عندها الزهار باش يولي موالينها وزراء". وتابع زعيم "البام" قوله: "كنسمعو هادشي، والشعب المغربي، ومعاه المراقبين كيقلبوا على شي حاجة سميتها مشروع حكومي وبرنامج يعبر عن تطلعات المواطنات والمواطنين".
