الموظف "لّلي فيه اللعبة"

مللي كنت موظف، طبعا من الصغار، واخا سلم 10، حيت الموظف الكبير والصغير ما كنقيسوهش بالسلم الوظيفي، كنقيسوه بسلم الفساد الإداري ، ويمكن يكون غير سلم واحد كيف كان واحد الشاوش عندنا ويكون فيديه الصلاحيات ديال الإدارة كاملة ، وكتجيه هاد الصلاحيات من التميز ديالو فثلاث حالات كلها كتصب فعلاقته برئيس الإدارة
1 علاقة القرابة ( باك صاحبي )
2 علاقة خدمة الرئيس ( تقريب الرشوة من المسؤول )
3 العلاقات السياسية فالحزب لي فيه المسؤول الإداري ولا لي كينتفع على ظهره
وانا ملي كنت موظف ماعندي حتى وحدة من هاد الكفاءات المميزة للموظف الكبير، وكنت ديما فشد ليا نقطع ليك مع إدارة الجماعة لي كنت خدام فيها ، حيت طلقو عليا موظفين صغار فالسلم وكبار فالنفوذ يقلقلوني، وملي لقاو عندي فكر يساري تهموني بللي أن كنساند حزب التقدم والإشتراكية وحزب الإتحاد الإشتراكي وأنا لي كيجمعني مع هاد الأحزاب غير المثقفين ديالها لي كلهم اصحابي ولا كنقرا ليهم ، وهنا كانو كيحاربوني كاع ( السياسيين ) لي فالمجلس الجماعي ، ودرتها بين قوسين حيت ماعندهم علاقة لا بسياسة ولا بادارة ولا بشأن عام ، وكانت السلطة هي لي كتسيرهم " شا شا را را "
المهم كاع الموظفين لي ماعندهم حد من هاد ( السياسيين ) كياكل لعصا ، إما كيبعدوه للتيساع عليهم ، إما كيضغطو عليه بالعقوبات الإدارية ، إما كيطلقو عليه لي ينغص عليه حياتو فالحومة لي ساكن فيها ولي حتى هي واصلين ليها بالبيادق ديالهم والمقدمين والشيوخ لي موكلينهم من الطجين
الموظف الصغير فالسلم ولا فالذمة كيترقى وكيدخل الريع وكيتغنى وكيولي عندو نفوذ كبير ويمكن يتبناه – بل كيتبناه – شي حزب وكيرشحو وكيولي من الأعيان الكبار بزاف ، وهاد الحالات بزاف منكم كيعرفها ، ماشي غير جاب ليا الله وقلتها ، والموظف اللي عنده ذمة واخا يكون خارج السلالم كيبقى التحت وكتضيع منه السنوات وكيولي فيه السكر والكلاوي والقلب ، وملي كيموت كيقولو عليه المقهورين " كان موظف شريف مسكين " وطيقولو عليه المنتفعين " كان كامبو ومعكس ومكلخ حتى جابها فراسو بالمرض "
على هاد الشي خرجت من الوظيفة العمومية ، حيت الفساد فيها بنيوي ، بدا مع الإستعمار ، ملي كانو غير الخونة لي كيخدموهم باش يحكرو على الشعب ، وملي طلقها الإستعمار شدها المخزن وبدا كيدخل غير لي معه ولي غيقمع ليه الشعب لي كيطلب شس مصلحة منه ، ومن بعد " التحديث " ولاو كيدخلو غير القافزين منهم لي مع الأحزاب ومنهم لي كيخدم الأحزاب ، واستشرى الفساد
سؤال : واش كاين شي موظف عندو باك صاحبي غيحاسبوه إلى ما مشاش باك صاحبي ديالو
واش كاين شي موظف موتورط مع الكبار فالسياسة والدولة غيطيروه من بلاصته وهو عنده ملفات ما عدا إلى تواو معاه على الثمن باش يمشي فحالو ولا للحبس كاع باش يغطي عليهم
واش كاين شي موظف لي اولاده ومراتو ولفو الريع ديال الإدارة والامتيازات ديال الشيفور والأسفار والإكراميات والخروج عطلة فابور وووو وغيتنازل على خدمة الفساد
المهم الموظف فيه وفيه ، ولكن الموظف لي فيه اللعبة ماشي بحال للي مافيه حتى لعبة ، واللعبة كلها سياسية
وارحموا اخوكم الموظف