ماشي غير جي وكول أنا مدير !

من بعد لمقال ديالي لخر في كود، اتصل بي واحد الصديق وكال لي : ملي كتشد في لعرايشي وسليم الشيخ وصارم الفاسي يمكن الناس يتعاطفوا معك، ولكن ملي كتمدح الصايل غادين إكولوا غير حنت صاحبك، وهادي ماشي في مصلحتك…
وهانا غادي نكول لكم جوابي بلا زيادة ولا نقصان : أولا أنا ما كنشدش في لعرايشي ولا غيره، أنا كنمارس حق كيضمنه لي الدستور وكاع القوانين ديال لبلاد ولي كيسمحوا لي نفضح أي خروج عليهم وأي شطط في استعمال السلطة وأي ممارسة ديال الرشوة والمحسوبية والزبونية وأي مس بالمكتسبات ديال المهنة ديالي، ولعرايشي وصحابه ريحتهم عاطية في هاد المجال، ولا كالوا العكس يدعيوني راه القانون كيسمح لهم أتهموني بلفتراء والقدف، وزايدون لعرايشي ما بقى ليه غير التسجيل فموسوعة كينيس كركوردمان ديال الفساد، وصارم لتاحق به دبا…
بالنسبة لنور الدين الصايل ما كلت غير لي كاين بكيفية موضوعية والواقع كيأكد هاداك الشي. وفي الواقع الصايل ماشي غير صديق، وهادا ماشي عيب، بل كذلك ومثال أستاذي ومثلي الأعلى وكنفتخر بهاد الشي، وأنا كنت ديما مخلص للصداقة بشكل كبير، ماشي بحال شي بعضين لي كيبدلوا صحابهم بحال كيبدلوا قوامجهم، كيف كال الصديق الكاتب الجميل ادريس الخوري، وكون كانوا كاع المدراء بحال الصايل كون لبلاد مشات بعيد من شحال هادي… وكيفما كان الحال، بالنسبة لي ولكاع الناس لكيعرفوا الموضوع مزيان، كاين فرق كبير بين نور الدين الصايل ولعرايشي وصحابه :
لعرايشي وزبانيته خدامين ب"سياسة باك صاحبي" وخا خلات إداراتهم مشات خلا، وبالنسبة ليهم كلشي بلفلوس كيتباع ويتشرى، وكل واحد فيهم داير لائحة كحلة (بلاك ليست)، والحمده لله أنا لول فيهم بثلاثة !..
الصايل من نهار عرفته، هادي تقريبا 40 عام، أهم شيىء عنده هو الكفاءة والصدق في المبادئ وفي العمل وما عندوش مع اللوائح الكحلة… هادا ما كاين…
ودبا راها ولات مصيبة كبيرة… أي واحد تعين في شي إدارة عمومية كيحسبها ورث خلاه ليه باه وكيولي داير فيها ما بغى ! بلا قانون ولا ديمقراطية، ما كاين غير أرى برع بالرشوة والمحسوبية والزبونية، والكفاءة والجودة ما عندهم بها غرض !.. وإلى دعيتيه كاع تخسر، حنت بهاديك الرشوة لي كيجمع كيشري كلشي : الوكيل والقاضي وحتى المحامي ديالك !..
راه خاص شي زلزال كبير باش تحارب هاد السياسة هادي لأنها خارجة على لبلاد ولعباد : مثلا يتشدوا كاع المدراء ديال المؤسسات العمومية ويتحاكموا… 2 ولى 3 لي معيقين بزاف ياخدوا الاعدام، وشي 10 يتحكموا ب20 عام ديال الحبس، وشي 10 خرين ب 10 سنين، وشوف تشوف واش هادوك لي غادين إجيوا من بعدهم إوليوا إخافوا وإحشموا ويحتارموا شوي القانون والديمقراطية فتسيير الإدارات العمومية !..
يالله أترونسبرينسي ومنظمات وجمعيات حقوق الإنسان والمجتمع المدني آش كتكولوا ؟