زجل .. الْحَكْرَةْ

الْحَكْرَةْ حَارَّةْ وُ مَرَّةْ
شْعُوبْ عَايْشَةْ مَقْهُورَةْ
وُ شْعُوبْ عَايْشَةْ حُرَّةْ
شْعُوبْ تَتْمَتَّعْ بَالْحُقُوقْ وَ الشُّورَى
وَشْعُوبْ مَنْ أعْنَاقْهَا مَجْرُورَةْ
تْكُولْ نْعَامْ أَسِيدْ الْوَالي الْحَالَةْ مَبْشُورَةْ
مَا بْقَى مَنْ الْإنْسَانْ فِيهَا غِيرْ الصُّورَةْ
شْعُوبْ فَ الْجَهْلْ وُالْأُميَّةْ مَطْمُورَةْ
وَ شْعُوبْ كَاتْبَةْ فَ الْعُلُومْ سْطُورَا
شْعُوبْ مَتْقَدْمَةْ مَنْصُورَةْ
وَشْعُوبْ بْالَهْزَايَمْ مَدْحُورَةْ
فْوَاهْهَا مَكْمُومَةْ مَمْنُوعَةْ مَ الْهَضْرَةْ
وَشْعُوبْ بَلْغَاتْ بْحُرّيَتْهَا الْقَمْرَةْ
شْعُوبْ حَكَّامْهَا عْليهُمْ نْسُورَا
وَعْلَى عَدْيَانْهَا عَصْفُورَةْ
يْمَلْؤُوا لَبْلاَدْ لْحُودْ وَ قْبُورَا
وَشْعُوبْ حَكَّامْهَا مَبْرُورَةْ
عَايْشَةْ فَبْلَادْهَا هَانْيَةْ مَسْرُورَةْ
وَالْيُومْ الشْعُوبْ مَنْ الْحَكْرَةْ نَافْرَةْ
وَعْلَى حْيَاةْ الْحُرِّيَةْ رَاهَا مْقَرْرَةْ
وَعْلَى حَكَّامْهَا ثَايْرَةْ