يمكن

يمكن تهرس فيا صوتي
وطلعت الكلمة مجروحة
بهاتت ريحة الورد
وسكن فيا لونو
طاح ضو الصباح
وفاق فيا صو
بوهالية انا
والقصيدة وتاتني
نحك همي ع لحجر
نلبس وراق الشجر
نتسنى قلبي يزهر
يمكن شي نهار الغلة تبان
يمكن نلقاني ..تمرة
تتشهاني لفريق الصيام
يمكن
يمكن
يمكن
حيت يمكن أنا
ويمكن انت
ويمكن احنا بجوج
نغمة فالتة من هجهوج
يمكن نرقع بفرحي همك
نحضن صوت نواحك
نخاوي جرحي مع جرحك
نلبسك فرحي
ساعة قرحك
يمكن تسكني ونسكنك
تشربني ونشربك
ترد بيا عطشك ....نروى
حيت يمكن نت عيني
وأنا النظر
نت الورقة وأنا السطر
يمكن حيت يمكن
نفيق ف راسي من جديد
يقراني كفي ..
كيف حلمت بيه
يمكن بيرك يا دنيا غارق...
وأنا عطشي شحفان
ميزانك مايل
وصروفي تقيلة
عييت نعبر الخطوة بالكرام
بغيت نركب عودي
نطير ف سما حلمي
نعجن الزمان
ندري ليام
نعزل لمحبة
من المخضة اللولى
يمكن نحيل الفرح
وكل ليلة...
نضوي قلبي بشوفتو