مسارب القصيدة

توهم أنك عشقت ودق على باب الكتبة ،
نادي على عشرانك في الجذبة
وإذا قالو شكون ؟ قل غير أنا ... في العتبة .
يسيح ... يجمع صوف الكلام ،
ينسج به للحكاية إيزار ،
للشاعر راوي / للفارس راوي
وصاحب القلم للعشق راوي .
قال الشاعر : سمكة ماشي لك
فراشة ماشي لك
ونحلة ماشي لك .
قال : القصيدة لي .
.........
قال : سحبت الطريق / البحر / الشجر ،
سحبت ظلي ،
غير باني من فنايَ
باش يقول عليك الشيخ الأكبر « فراشة غدا « .
عزِّيني ..... هانا مت ،
أش تقولي لي غدَّا : أنا سبب موتك ؟
..........
قال : حماقي حقي باش نكون ،
نجاور فراشة .... وهي سِر ن
دابا من بعد الرماد تكون ،
...........
باش نكون .
............
أنا غير راوي ...
قال : في الفْنا ميلاد وفي الميلاد فْنا ،
وصَّاني نروي فناه بكلامو .....
وصَّاني نحيا .
توهم أنك عشقت واسقِ ضو الكلام بعماك .
قال : لمَّا مت على قبري تفكروا بلادي .. الما ... توحشت راسي .... حريفات .... بسمة القصيدة ....وانا نلاحق في موتي ، ذاقو – بعد دفني – طلوع القصيدة و غفلتهم سربة البحر و رقصة سمكة فيه ... كانو « أوفياء « .. ردو قبري بستان و سقاوه بكلامي ، جات فراشة وقالت : « هم انتَ وهانا مكتوبة عليك « .
..........
القصيدة الحاجبة فراشة
والشاعر بستان مصلوب على الورقة .
توهم أنك عشقت وبح بما شفت .
فراشة خاصمتهم وهو حاير فين يكون ،
عطاتو الإشارة
قال : طرزيني نَحْلى
كوني فراشة ، كوني نحلة .... عسلك – أنا ساقيه .
شعليني شمعة ..... نورك لنوري طافيه ...
خليني نشوفك اعمى
خليك نور ما يطفى ،
خليك مشنقة للظلام - بجناحي لك نصفى ،
خليك تكوني سري ،
امحيني / دفنيني ،
لك نكون الما لمَّا يصفى .
خليك تكوني « يعوَّل عليك «
خلِّيك تكوني « ما خْفى «
نلقاك وانا رمادك ،
تلبسيني وانتِ « ما صفى « .
خلِّيك تكوني « يعوَّل عليك « ، خليك تكوني « ما خْفى « ،
نلقاك وانا رمادك .... تلبسيني وانتِ « ما صفى « .
..............
قال : راضيني ونراضيك والعشق يمحينا ،
نكون منك طريق ،
وتكوني منِّي نور كلما بداني الحريق .
يشعلنا اللي « يعوَّل عليه « ... يفنينا ويحيينا ،
تكون السكرة بك - فيك جنَّة .
تا حد ما حد حقُّه .... ويفهم
آش كنا في الوهم واش في الحق و لِّينا؟
خلِّينا يا « ناري « خلينا ،
ما حْنا غير احْنا .... افْنينا أو احْييينا ....
توهم أنك عشقت واحك ما ريت
هو سندباد ما عنده مرسى غيرها ، يغوي حفلة الموت أو شهوة الحياة ... الفراشة عندها جنان جنب الواد وهو بحر يتمايل غيابه لصحرا فايقة من سرابو باش يفيق في « سرة السؤال « ... يستحلى يكون مخدَّر بها ، ما يميل غير بإشارتها ، بلا بها في بحر مظلام .... تهرب عليه حروفو ، ولمَّا يكون بستان وترضى عليه فراشة يفنى باش يحضن الكون ، يلقى ذاتو فراشة يتَّحرق ، رمادو « مازير « ترشو ... يزهر .... نايو من روحو ..... تْنِين وهي ترقص عليه – فيه
.......تمنَّى يكون نبضة في قلب القصيدة ، خفقة في جناح فراشة ، موجة - سلهام لسمكة .... تمنَّى يكون سَما لبسمة ..... تمنَّى ما يبقاش باش يكون .
فَنِّيه راه « انتحاري « ماحي الماضي ،
حلمه يوصل للقصيدة العاصية .
في التاريخ تخاصمو فقها و صوفية وكلها و « فراشته « وهو ما مخاصم حد ، اختار يكون « فراشته « يتَّحرق باش تحيا هي، وقال :
القصيدة فراشة خلِّيها حرة ،
كن « مريدها « تلقاك فيها ،
حررها تحيا - تبقى ،
احبسها فيك تفنى .
وقلت أنا ( راوي هاذ السيرة ) :
ديرو قبري في كدية ، جنانها شوق و محنَّة،
يكون الشاهد دالية و تكون المحبَّة مزنة .
.......
توهم أنك عشقت و شُفيت
قلت له : واش بريتي منِّي ؟
ودار الكلام بينكم و ما خيطوه
( ما ريتنيش )
واش انت بلا بي ؟
تالف في البرزخ
ما تكون بلا بي َّ
حيرتك فناك باش تلقاني .
هي انتِ قصيدتي ... « عاصية و مستحيلة « .
وانا غير وهم عنيد ما بغيت نشفى منك .
أنا غير حروف ... انتِ من خلقها ،
ومالي غير معبود اخرس ولذاتو سامع .
صراخي – صمتي طريق لذاتي ، فُكي سراحي / نغطس في في حماقي ...
باش نكون بستان / يرعاك – تحكمو .
........
........وانا « راوي سيرتهم « قلت :
المعبد حمّام يصلي فيه شيطان
عشتار ساحراه ، في قبره مسلسلاه .
توهم أنك عشقت و احتر في قيدك....... تكون،
بديت نعلَّم راسي الحماق لعلَّ يلقى طريق ،
يسرح منه لراسو ويلقاني غارق في ضوها وما عارف والي .
النهار رسل الفجر غازي
رش الليل بالنار ... احرق إيزارو ،
مشى عريان يتخبَّى ،
يتْشَتَّت ظل هنا وظل هناك ...
......وصل ......
الشمس شطبت ما تحتحت من سقف الظلام .
قال : نكون ظلك ، ما نشوف غيرك
قال : ( بعدما ذاق الفنا عسل ) :
نموت فيك نحيا
كتبي منِّي رسالة والعنوان ثابوتي .
قلت : اللِّي قال عليَّ « أنا بعقلي « بعد ما ولدت « فراشة «
نقول له : الله يعطيه عقلي « .
........
........
قال : باش نكون بستان يلزمني فراشة
وباش نكون خاصني ما نكونش
.........
قال وهو في جذبتو : ما نفيق من سكرتي (منك – بك – فيك )
غير تسقيني عرقك تحت جلدي ....
نرجع لسكرتي .
قلت بعد مولانا : أنا لك ما ترجعينيش ليَّ .
وانا واهم في زيارة مولانا قلت لظلي :
قصيدتي فراشتي وانا بستانها ..... نحجب النار عليها .
.........
.......... قلت / قال : ما تبعديش الكاس عليَّ
( ما تبعدينيش على كاسي )
وصليني على قصيدتي / مدادي منِّي يقطر ،
يرسمني على الورقة بستان،
روحه فراشة
منحوتة من الرماد .
النفس الأول من ديوان « توهم أنك عشقت « قيد التنقية.