سمكة في الكف مفتاح السر - قبل ما يكون الصليب - سلام و محبة . البحر مصلوب وسمكة ورثت سره نور . البحر ميت مشى عليه المسيح ? احيى كانت فيه سمكة . سمكة تقطرت من دم المسيح نور وضوَّات اعماق البحر. سمكة سر في اليد والكفوف كلها بحر . المسيح تأمَّل سمكة ? في الكف وقال له : كن بحر البحر " ماه مقدَّس " إيلا كانت فيه سمكة ................ هي ظل مستور في الما نتحدَّاك يا بحر تكون لغير سمكة نتحدَّاك تكون " صليب " و" الألم " طريق .............. سمكة سر ... وانت حجابه والمحبَّة مفتاح السر . سمكة طايرة والبحر سما ، تمنَّى يكون سحابة بدمه يكتب السر . البحر مشْلول إيلا ما فرحت سمكة . للبحر تفاحة من " شعر " حنَّاتْها سمكة غار آدم وترَنَّح في القصيدة البحر غسل برنوسه بالشتا لبس حزام الزهرا ( قوس قزح) لعلَّ يلقى سمكة طايرة منُّه ........... وخرج من الجنة . ما في البحر غير سمكة . سمكة مسافرة للخلود والبحر سفينتها . ما في الكاس - بحر وسمكة " إيقاعه " وال بسمة راحت لقبرها بين الحروف تَهْجي لَحْمَاق . الكاس سر - و ما فيه شعر، سمكة نور حجابها بحر، وال بسمة اختارت قبر . البحر سكران ، سمكة طارت وولاَّت . سمكة عسل في ملح البحر كوني سمكة باش يبان البحر. سمكة في بحر- بتفعيلة وحدة بلا " زحاف " بلا " عِلَّة " البحر لجَّم حمقه حتى ما تعيى سمكة . سمكة عين من النور تفيض في قلب البحر . روح البحر غطست في العسل باش تذوق سمكة " السر" . البحر عشق وغرق وسمكة خبَّاتو . البحر كاس سمكة قطرت فيه السر . سمكة نور في البحر، الفنا فيه صلاة ، و" الرجوع منه بلا غفران " الكاس رسول وحنا فيه رسالة ، ندفن ال بسمة وتحلَّق سمكة . البحر " فرس " سمكة فارس والشِّعْر يسرق ما خبّات النية . البحر حجاب سمكة وسمكة نور كاشفو . لمَّا مَوْلَت سمكة علاَّت لمواج و جف البحر، خبَّاه في صدرو باش تعوم فيه طول العمر. وقفت الروح بين " سين " وسين " وحار .... حار الخوارمي . نوضي ...... سيري جيبيه ، إيلا بغيتي تخيطي نور العشق بظله في البحر . الشذرة سمكة و خاطره بحر يموت في الغيمة ويعرف السر . لمَّا قتلاتو القصيدة في مرَّة ولَّى بحر وسمكة شذرة . قتلاتو القصيدة في أول السطر عملت له سمكة " بوس أَ بوس .......... ولاَّت شّذرة وهو لها بحر . " سرير القمر " ..... بحر، بلا سمكة يكون قبر. خذا طريَّف من الظل زرعو في خياله تهرقت من الظل حروف على صفحة البحر ولاَّت امواج تهر سمكة . البحر و سمكة ظل مخيَّط بظل شعل الصوت .......... ما بقاوش . سمكة ضو ما يمحيه ضو لمواج . لبست سمكة موج البحر، هي ضْوات واليل تْخَدَّر . البحر نفخ فيه سيدنا الريح و ولد سمكة من مرايتو الدخلانيَّة . النجوم بكات على بحر? بلا سمكة . تمنَّى البحر ينسى قصيدة في فم سمكة . بْعَيْنُو مغمضة شاف سمكة قايدة البحر. ماعمَّر البحر سْكر وبعسل سمكة سْكر . من سمكة ذاق البحر " عسل الجنة سرَح في " البستان " .......... فاق من الحلمة وقْنَع ب " أضعف الإيمان " . عانق البحر سمكة وتبورَش الشِّعْر . في السما قالو : و قيلَ كاين القمر ، وفي البحر : - بالصح - سمكة قمر . في سمكة : الشك رفقة وفي البحر : العشق رفقة . يا لبحر ، يا سمكة : الحيرة طريق والعشق وصول . " السيمرغ " في السما ، في البر ، وسمكة كتابُه في البحر . العقل لجام والخاطر بحر، سمكة ضو ? مخبِّي في السر . ............ و ............ وحْيَى البحر . " الهدهد " عمل نظاظر ، ما بقى يجيب اخبار.... يبحث على خاتم الحكمة في دواخل سمكة ، وسمكة في البحر ، والبحر مخَبِّي في الورقة ، والورقة مازالت في الشجرة ، والشجرة مازالت في البذرة ، والبذرة في قلب القصيدة ( .... ) دفناتو في كتابُه ، ومن الظل تَّبعثت شذرة ? ضوَّات قبرُه ، فاض حتى اعمَر البحر ، ....... وفي البحر سمكة ........ و....... و ....... و ....... حتى طار الهدهد يخبر السيمرغ . كان البحر سْماها اعطش وخاف على سمكة . الحرف من كف القصيدة انسل، تململ ، البحر تبورش منه سمكة تطل . الموج دفناتو القصيدة في الرمل والبحر فاق ، بسمكة احبل . يا لالَّة الموت ........... راكم شختو ، ............... سمكة في البحر احياتو . سمكة حرف فريد في اعماق البحر. البحر مرايا سمكة تشوف فيه زينها . تلحفت سمكة بالموج والحروف طلو من البحر. البحر سرق قصيدة " منه " و سمكة قفل ، حرف منها سر في الموج اوحل ، بكى ، الموج تشل ، ............... والبحر طوى روحو لسمكة انزل ، مات في طريقو قبل ما يوصل . الموج سرج الحرف رْسَن ، وسمكة طايرة ركبَت البحر . القصيدة عطات بالظهر الحرف في ظله اعتر ، ضوَّات سمكة والبحر - بالحروف نوَّر . قتلاتو قصيدة احياتو سمكة ، كان ظل و ولَّى بحر . القصيدة ذابت الحرف نزف الموج عزف البحر ولَّى نبضه ميزان لمَّا قالت سمكة : خاصَّك تعرف. طارت قصيدة خلاَّت حرف بين الرمل و الصخر، حضناتو سمكة شعلاتو بالمواج ، خرجات خوتو من القبر ، ............... البحر كان مدفون كان غابر واظهر . سمكة قصيدة ميزانها البحر . والميزان بلا كلام ، .............. واخَّا هلاَّت سمكة قصيدة ما تظهر ، البحر ما يكون غير رماد ، ورقة في المجمر ، ناسي راسو وفي سْطورو اظهر . البحر ما يتَّسع لغير سمكة تَنْشُر السر وتْعَلَّم ْ المحبَّة . فين كان ساهي هاذ البحر ( في ال بسمة اعْتَر ) و سمكة فيه، حتى مات وما جاب خْبر ؟؟ سمكة ضوات و كْنَز نورها البحر، تبقى فيه نبضُه - تبقى سر . القصيدة ريق الموت وسمكة ريح الحياة ، البحر- من رمادو- نسج صفحة جديدة خلاَّت الحروف " فراشات " يْرَشُّو النور في ماه . غابت القصيدة خْوَى البحر ، ضحكت سمكة و عْمَر البحر . (........ ) تَّفْتَح كتاب النور حريفات تَتْقَطَّر . كانت " نون " وكان مَرَّة واد ومرة بحر ، كانت سمكة في دواخلو ..... نور يزهر . كان حتى كان سمكة في بحر ، و كانت قصيدة فيها سر : ضوها يستر . البحر اهْبَل قلبه نْبَض و ما فيهش سمكة . سمكة ? بسمتها نوتة في بهجة البحر. ما يكون بحر بلا سمكة . ما تَفْنَى وتلقاك حتى تكون بحر وتكون فيك سمكة . سمكة برق في قلب البحر " سَكِينَة قبل الفنا " . بغى البحر يسكر كانت ذاتو كاس وسمكة خمر ، ( ...... ........ ........ ) ، وفاق? لقى في يده ورقة عليها : بغيت سمكة ما بغيت نفيق من السكرة. البحر مْحَا ظله و شطَّب حالُه ، ضحكت سمكة فيه و نسى فْناه ، لاح كفنُه " شَطَحَت " امواجُه . اضوى الكون وحجبو ، ( ....... ........ )، سمكة معاه . لمَّا ترضى سمكة على البحر ترقص امواجُه ، ويدفن الليل - مسلسل بنجومه. البحر وصل " مقام المحو " تلَّف ذاتو، وبقات سمكة منها يبدا حياتو . ما في البحر سرغير سمكة . البحر اعمى إلا َّ إذا شاف سمكة . البحر ما يشوف غير سمكة وغيرها " شواطئ مهجورة " . ياريت الكلام حجاب، البحر مستور في " الخَيال " وسمكة في البحر مستورة حكمتها نور " ملتبس . اعطيني سمكة نعطيك بحر . البحر جامد سمكة ما تحركتش . بغى البحر يمثَّل ... بلا سمكة وهو يتَّخْنَق . عطشان وهو بحر : سمكة ما فيهش . المصب قَلْب وهو كان بحر ، احنى للنور ، سمكة " إشارة المرور " . عسل سمكة في ملح البحر واللسان ما فيه غير " الشِّعْر" . الشتا تصب على البحر باش يروى و تلعب سمكة . البحر ضوَّى لمَّا ضحكت سمكة . البحر حضن سمكة وفرويد ما فْهَم وااااالو . الغايب الحاضر يمشي " منه " يغوص في البحر والبحر سترة ، ......... ما لقى غير سمكة توصلو " له " باش يفْنَى .
