"المساء" تنشر التسجيل الكامل لتصريح دومو بشان تزوير مؤتمر الاتحاد الاشتراكي

هذا هو نص المكالمة الهاتفية التي دارت بين صحافي "المساء"، سليمان الريسوني، وعضو اللجنة الإدارية لالتحاد الاشتراكي للقوات الشعبية، عبد العالي دومو، وفيه يتهم دومو بشكل صريح أكثر من جهة داخل الدولة بالتدخل ل"الضغط على المؤتمرين" لترجيح كفة ادريس لشكر.
وتجدون أن صحافي "المساء" قد التمس من دومو إن كان بإمكانه أن ينسب إليه ما صرح به عن الوزير المنتدب لدى وزير الداخلية، الشرقي اضريس، وبعد تفكير قال دومو: أنا لا أحبذ ذلك، من دون أن يرفض الأمر قطعا، ومع ذلك احترمت "المساء" رغبته غير القطعية ولم تنشر هذا الشق من التصريح.
اليوم أمام نفي عبد العالي دومو لما دار بينه وبين صحافي "المساء"، نجد أنفسنا مضطرين لنشر تصريحه كاملا، من أجل تأكيد مصداقية الجريدة.
نص المكالمة
- صحافي المساء: ما حقيقة الحديث اللي دار بينك وبين ادريس الراضي ديال الاتحاد الدستوري؟
عبد العالي دومو: الراضي اتصل بالمؤتمرين فسيدي قاسم وقال لهم راه الفوق باغيين ادريس لشكر وللي زْعْم عليه كيقو ليه: راه الوالي للي تكلم معانا
صحافي المساء: الوالي ديال آش"
عبد العالي دومو: والي واحد ديال وزارة الداخلية، الوالي عطا التعليمات باش تصوتو على لشكر. من بعد كان التدخل ديال وزارة الداخلية فالغرب بحيث اتصلوا بالمؤتمرين بأنفسهم من "DAG" مديرية الشؤون العامة. وفي حد كورت اتصلوا بمناضل محترم وقطع عليهم التلفون.
صحافي المساء: عندي لخبر، هو للي كانوا 2 ديال ولادو مؤتمرين؟
عبد العالي دومو: Exactement. أنا من بعد اتصلت بالراضي قلت لو حشومة عليك، تصاب بهزة، ولم يجبني لا بنعم ولا بلا. قلت لو كتعرف العلاقة للي كتربطنا بالسي عبد الواحد والمجهودات للي درنا معاه فالمؤتمر الثامن وللي باقيين كنديرو معاه باش يخرج من الباب الكبير ويسلم المشعل لأيادي آمنة. قلت لو أنا مكنفهمش هاذ التحرك ديالك ضد الأب الروحي ديالك للي هو عبد الواحد الراضي، بقا كيقول لي هكذا بالدارجة: ياك أخويا.. ياك أخويا.. ياك أخويا. زعما مبقاش قدر يجاوب. كاين إخوان فتادلة أزيلال للي تاصلو بنا حتى هما تاصلو بهم من وزارة الداخلية، مجموعة ديال الإخوان فالعرائش اتصلت "DAG" بمجموعة من الناس. ومراكش أنا عندي واحد السيد كتربطني به علاقة كبيرة وهو مستشار فالغرفة الثانية
صحافي المساء: هو مولاي الحسن؟
عبد العالي دومو: مولاي الحسن. هذا عندو علاقة ماشي سيئة مع لشكر. هذا دابز مع لشكر لأنه كان صاوب ليه شي دارو ومخلصوش كاع لشكر ودابزو دّابيز ديال السبان وقال ليه عمرك ما باقي تعفط فداري، وهذ السيد حنا منين كنديرو التجمعات كنديروهم عندو فدارو ومنين درنا التجمع ديال مراكش درناه عندو فدارو، وقال لينا أنا عفاكم، را نتوما الجهة منسجمة معكم، لكن أنا إذا ترشح فتح الله راعندي إحراج غادي نصوت لو صوتي انا غادي نعطيه ليه، انتوما كتاكلو الطعام فداري ميمكنش نخونكم، قلنا لو ماكاين مشكل يلا كان غير صوتك انت ماكاين تامشكل، كاين 158 مؤتمر في مراكش ماشي مشكل، وبقينا على هاذ الأساس، مللي جينا للمؤتمر فبوزنيقة كتجي عندي واحد الأخت من مراكش صديقة ديالو وديالي معانا فالتيار وكتقول لي راه مولاي الحسن كيدير الحملة لدريس لشكر، ما يمكنش. قلت لها يديرها لفتح الله معقولة ولكن ادريس ما يمكنش هو مخاصمو، قال لي لي را الناس للي هدر معاهم جاو قالوها لها قالو لها راه هدر معانا مولاي الحسن غا نصوتو على لشكر. فالليل عيطت ليه أنا مشينا لواحد لبلاصة معزولة فالتيساع وقلت لو: مولاي الحسن آش كدير ياك قلتي لي فتح الله؟ قال لي هكذا بهاذ الأسلوب: واش انت أ السي عبد العالي زعما معرفش آشنو واقع. قلت لو: لا ما عارفش آشنو واقع. قال لي راه السلطة متدخلة بقوة فهاذ الشي، وراه مللي هدرو معايا المرة الأولى والثانية وشافوني ماكندير والو، دابا را ولاو كيطلبو مني كندوز ليهم المؤتمرين مباشرة كيهدرو معاهم (يهمهم ويضيف) حنا للي كنا عايشي فالمعمعة معندناشي غرام ديال الشك فهاذ الشي. ومستعدين الناس للي هدرو معاهم مباشرة من "DAG" باش يشهدوا وزعما داك الشي. وما نزيدكش الناس ديال لا بريس (الصحافة) التلفزيون كيوجدو الندوة الصحافية ديال النتيجة ووزير الداخلية بنفسو كيقول لهم راه رجل المرحلة هو فلان
صحافي المساء: فين؟
عبد العالي دومو: هادو les deux chaines (القناة التلفزية الأولى والثانية) كيوجدو للندوة الصحافية وشافهم الوزير ديال الداخلية قبل النتيجو وقبل التصويت وتيغبر لهم علانية أن رجل المرحلة هو ادريس لشكر
صحافي المساء: هادي أ السي عبد العالي نقدر نقولها على سميتك؟
عبد العالي دومو: (بعد تفكير) أنا أحبذ لا.. لأنه يلا مشينا للمواجهة خصنا نديروها قانونية.. حسن طارق يمكن لك تعيط ليه يثبت لك أن نهار الاثنين مللي سالين المؤتمر كانت الأسئلة الشفاهية حسن جا سلم على لشكر على لشكر وقال ليه هنيئا لنا جميعا أحسنتم الاختيار هذا هو رجل المرحلة
صحافي المساء: شكون للي قالها؟
عبد العالي دومو: الضريس. الضريس. الضريس. ماشي العنصر، منين تنقولو وزير الداخلية تدخل هو الضريس هو للي عندنا عليه معطيات تدخل. العنصر ماتدخلش. الإخوان ديال كلميم، بلفقيه وحسن الدرهم، بسميت الضريس، بلفقيه كيقول للناس: الضريس هدر معايا وقال لي را سيدنا باغي لشكر. هكذا. ومجموعة ديال الأمثلة فمجموعة ديال المناطق. واحد السيد كان معانا برلماني معانا ملتزم معانا، وعندو واحد صاحبو الحسن الجوهري ديال الصويرة هو للي جابو للحزب جلسنا معاه والتزم ومشا بدا كيدير الحمل لينا شويا قطع التلفون ديالو ومبقيناش شفناه. هذا برلماني د الناظور سميتو أبركان.
صحافي المساء: واش هو والجوهري؟
عبد العالي دومو: لا الجوهري هو الساروت ديالو وهو للي جابو للحزب وهما بجوج فالصيد البحري وعندهم معاملات تجارية كبيرة وميمكنش يفوت الجوهري. الجوهري معانا حنا الآخر التزم معانا ودار الحملة معانا شويا قطع علينا وعليه التلفون مرة واحد، مللي بقينا كنبحثوا قال لك أسيد يراه هدرو معاه، شي واحد سولو ماشي تا فالتلفون جاوبو وقال لو راه هدر معاه الوالي.
للإستماع لتسجيل المكالمة الهاتفية كاملة أنقر على هذا الرابط :
‏http://www.youtube.com/embed/N2qIb5BdP-k?rel=0