وحيد ولا بد. وا لمغاربة واش وليتو خفاف. كيفاش "ارحل". عنداكم يوقع ليكم ما وقع لخوتكم المصريين جراو على كيروش وجابو مصري ضربهم لخلا

كاينة حملة غريبة عجيبة على مدرب الاسود البوسني وحيد خاليلوڤيتش. قبل الماتش شي وحدين كانو كيتسناوه يخسر باش يزيدو يسعرو فحملة "ارحل". هاد الثقافة كاينة فالدول غير الديموقراطية او اللي ما عندهاش تقاليد ديموقراطية. المواطن كيتولي الكورة عندو ماشي رياضة فقط واخا برهانات سياسية٬ ولكن بيها باغي يحل مشاكيلو مع الدولة ومع الحكومة ومع حقوق الانسان ومع الرشوة ومع الحگرة. هنا كاين المشكل.
ما كاين هاداك "فصل" الكورة عن مشاكل المواطن اليومية. الكورة كتولي المتنفس يمكن الوحيد.
دابا البارح المنتخب ربح جنوب افريقيا بجوج لواحد. ماتش صعيب بحال كاع الماتشات ومع دولة مزيانة واخا السنوات الاخيرة نعسات. الرباح كان صعيب وللي صعيب هي الاجواء المسمومة اللي سبقاتو. هاد الطاقة الخايبة تحولات للمنتخب. بانت على اللعابة خاصة المهاجم تيسوداني. بان تالف وبزاف.
البارح دا المنتخب 3 نقاط ولا ربح ليبيريا السيمانا الجاية راه غادي يولي عندو 6 نقاطي وفهاد المجموعة كاينة غير 3 منتخبات٬ غادي يكون محتاج لتعادل ورباح مرة اخرى باش يكون رسميا فكأس افريقيا الكوت ديفوار 2023.
نرجعو لفرقة وحيد البارح. اولا بان مدرب قافز. بعد ما خسر الشوط الاول بواحد لزيرو واخا شاف تيسوداني كيضيع خلاه حتى الشوط الثاني. كون خرجو كان يقدر يزيد يأزم هاد اللعاب اللي غادي يكون فشي شكل بعد ماتش البارح. دار تغييرات ربحاتو الماتش. دخل حارث واوناحي والكعبي. هادو منهم جا هدف الفوز.
اه كان عندو مشكلة فوسط الميدان وحتى فاللول. فالوسط كان ضعيف لان املاح ما كانش فنهارو وامرابط بان ثقيل بزاف. اللي تحمل هاد الشي هو غانم سايس واكرد وباقي المدافعين.
لكن كانت امور ايجابية كتفرح من غير الرباح. الشاعر رجع لمستواه وهو اسم على مسمى وحارث رجع للمنتخب وغادي مزيان والكعبي والنصيري تصالحو مع الشبكة.
المهم هاد المدرب داير خدمتو. ايلى كان شي حد فشي جهة استغل القصة ديال زياش وبغى يبدل هاد المدرب راه المنتخب اللي غادي يخسر. شفنا اش وقع فمصر مع الغباء اللي عندهم. كان عندهم مدرب كبير اللي هو كيروش. بقاو عليه حتى الاتحاد المصري لكرة القدم بطريقة شعبوية جدا عليه وجاب مدرب مصري. النتيجة: خسرو مع اثيوبيا بجوج لزيرو. خسارة ماشي غير رياضية. الصراع لكبير بين مصر واثيوبيا تاريخيا خلى لهدا الخسارة طعم اخر. اخر المشاكل بيناتهم هو سد النهضة اللي دارتو ديرو هاد الدولة ورفضاتو مصر حقاش كيهددها. ما النيل غادي يقلال.
دابا حنا ماشي مصر. حقاش تأهلنا للمونديال بفضل وحيد وربحنا اول ماتش بفضل وحيد. راه ايلى قسناه قبل مونديال قطر يقدر يخلينا ماشي غير نخسرو الماتشات بثلاثة فمجموعتنا اللي فيها بلجيكا وكرواتيا وكندا بل غاديين نشوهو.
لمغاربة ما خاصهم يكونو خفاف. شوية لعقل. المهم فالكورة هو الرباح. الباقي تفاصيل.
تحبو وحيد او ما تحبوهش راه داير خدمة رائعة مع الاسود. راه كيدربهم باش يوليو سبوعا. هادي طريق طويلة وخليو السيد يخدم