الازمة اللي دخلات ازيلال للاتحاد الاوربي

ناضت الولايات المتحدة بعدما حسات براسها وفي ظل البحت ديالها المستمر على الانفراد بالسيطرة وقيادة العالم ومع التنامي المستمروالتضخم المالي اللي كتعرفو المؤسسات المالية والابناك،كتقلب على شي متنفس للفائض الانتاجي ديالها مع الحفاض على وجه الدولار مرفوع.
فكرات وفكرات فهاد شريك العمر اللي خصو يكون فمستواها
اسيا بلاد زينة وعندها مستقبل واعد ، التكنولوجيا، الصناعة ، وحتى الفلاحة ، لكن دوك الصفرين ما فيهوم تقة وتاريخ المريكان معاهوم خايب ولاو مهتمين كتر بالتسلح.
افريقيا دراوش وخا كحلين فيهوم صحاب الحروف الزينة ولاكين تاني المجاعة، الاوبئة ، البطالة ، واللي فيهوم يحمر الوجه عامر كريديات ومشاكل اللهم التيساع حتى اوروبا ما خلات فيهوم ما يتشاف.
اوروبا وعلاش اللا صحيح هي التهديد الوحيد لكن الى جمعنا السواقي نحملو الواد وما يوقف فطريقنا حد.
ولكن-اوروبا ولات اتحاد اوربي؟؟
فكرات حتى عيات وقالت الحل هو الزواج بالنيابة نزوجو الدولار باليورو وخا زواج مصلحة ما فيها باس ايولدو لينا نظام جديد فيه دمنا كاملين.
دارت الايام وتخاصم الدولار مع اليورو عايرو قاليه شكون باك اولد الزنقة
فرقوا الجرة تماك قبل ما يديرو فالطاجين ما يتحرق.
تعصبات الميريكان وطاحت فازمة حيت خسرات الفلوس كتوجد خلصات الدقة المراكشية والغياطة من شمال افريقيا وحجزات الفنادق فالعالم كامل ووجدات الجزر فاسيا لشهر العسل.
دارت فلسطين لرمي الجلة والتبوريدة والعراق للالعاب النارية
ايران مالقات ما دير فيها غير كاشكاش.
عندها الزهر مازال ما عطاتش الصداق للاتحاد الاوربي حتى هو معول عليه صيفت كلشي حوايجو القديمة للمغرب والدول الفقيرة وبقا الله كريم
ناضت البلبلة فالاتحاد بعض الدول تشنجات ومرضات بحال اليونان جاها الجهل والصرع دارت فالسكان ديالها ما عقلاتش عليهوم ما كاين غير الكريساج.
المهم بغاو يكحلوها عماوها.
المغاربة استافدوا وكلشي حاسدنا بتصريحات من ساركوزي وخبراء الاقتصاد عاودنا البيع فديك الخردة وطمرنا على العربون اللي خدينا ، الازمة ما حسيناش بيها حيت ديما حنا فيها .
ستغلينا هاد الدوخة وطالبنا ندرجو ازيلال فالاتحاد الاوربي حيت عندنا اول مدرسة للمرافقين الجبليين فالمغرب خاص غير الكيادة يعاوننا يحرشو السياح من جهتهوم.
ابو سارة