قصائد زجلية

اتصاحب الما مع التراب
صحبة أخوة واحباب
اتفافقو يزرعو ويحصدو اصحاب
الما.. يسقي..
والتراب يربي
ويكتبو محصول الصابه في اكتاب
عمرو مطامر
واسعة اعريضة
قمح وفرينة واشعير
والباقي في الكاعة كثير
قالو شكون يخزن لينا
صابة عام الخير
صاح الفم ولبطن
احنا على الأمانة قادرين
وعلى العهد كل واحد منا يبصم
بعد سنة وشويه
الما..والتراب بغاو من مخزونهم كمية
الفم انسا وعدو ونكر
ولبطن تنفخات
حلفات قدامهم على لغير
قالو..ضاع مخزون الصابه
في فم ذيب وبطن نهابة
كالو حقوق الناس
حق لفقير وليتامه.
***
شكون
شكون يشوف اللي شفت بعينية
يحكي للناس
واللي بعيد مني عليا
شوفه باكية محنية
شوفة فم مكمم مربوط
وايدين خاوية مكوية
وشي بايع شاري نخاس
وشي في خوفو مكمد
دايرين عليه ألف عساس
شكون يشوف اللي شفت بعينيه
يشرح ويفسر لكل الناس
كلمة حامية راقدة في الجوف
ساجنها وسواس الخوف
ويكتب بصوت الرعد
جملة جبارة على لحيوط
تروي العطشان الملهوف
تفك اخبال حلم مسروق
وتحرر قلم من قمقم العاصفة
حلم حر معتوق
يكتب فوق كفوف لبحر والتراب
اية كبرى عاصفة
شكون …شكون…
***
غناية
غنات الشيخه
وشلا شيوخ أقدام
خوتنا يالسلام
زيدو بنا القدام
لاخيابت دابا تبيان
سرات المايه وجات
معانقه الطعريج..والبندري
والصوت الخاتر احرير
والكنبري والأمنيات
شي شربها معنى وافهامه
وشي شربها في قصارتو كيسان
عارسة لوعتها المحمومه في كل إمكان
لا صقه علقه في دم السامعين
ماعندها حدود ممنوعه
ماعندها بيبان
قالو الشيخة العوجه
مولات السيالة..والفلجة
بح صوتها الخاتر لغريب
مشتت بين جماعه مهمومه
قطع الوترة والسبيب
قالو صاح شيخ ارباعة لشهب
العيطه سالات
وكلامها صدا ماتلا فيه مايعجبه
شكون يحررني من حالي
ويزيد معايا قدامي
نحنيو ايدين الفرسان
نحرق لكل
في صعبه اقولها علام
ايردد صباح واعشية
خوتنا يلسلام
زيدو بنا القدام
لا خيابت دابا تبيان.
زجل: المسكيني الصغير