كاريدو: الماتش ضد سيمبا معقد وصعيب ولكن حنا واجدين باش نرجعو بالرباح للمغرب.. وأيت علال: الماتش ماغاديش يكون ساهل ولكن الوداد مستعد

أكد الإسباني كارلوس كاريدو مدرب الوداد الرياضي أن الماتش ضد سيمبا التنزاني غدا السبت بدار السلام، برسم ذهاب ربع نهائي عصبة أبطال إفريقيا ما غيكونش ساهل ولكن الفريق موجد له.
وتحدث كارلوس كاريدو خلال الندوة الصحافية اللي كتسبق ماتش الوداد الرياضي وسيمبا التنزاني وقال: "ماتش الذهاب ديما كيكون معقد وصعيب وحتى ماتش غدا من هذا النوع، كانوا عندنا بزاف ديال الاكراهات بحال السفر وغيرها ولكن الفريق كيعرف كيتعامل مع هذه الأمور، وحنا خدامين ومستعدين هجوميا ودفاعيا للماتش وكلشي غيدير المجهود ديالو باش نرجعو بالرباح".
وعبر حمزة أيت علال لاعب الوداد الرياضي حتى هو على صعوبة ماتش الفريق ضد سيمبا التنزاني وأكد أن بطل أفريقيا موجد لها.
وتحدث أيت علال خلال الندوة الصحافية وقال: "الماتش ماغاديش يكون ساهل غدا، حيث سيمبا عندهم فريق قوي، ولكن حنا الوداد مستعدين للمواجهة".
وغيلعب الوداد الرياضي غدا السبت مع سيمبا التنزاني إبتداء من الساعة الواحدة ظهرا بتوقيت المغرب، برسم ذهاب ربع نهائي عصبة أبطال إفريقيا، وهو الماتش اللي كيطمح فيه الفريق الأحمر أنه يرجع بنتيجة إيجابية قبل من مباراة الإياب بالمغرب باش يتأهل إلى دومي فينال المسابقة.