سابقة.. بعد فضيحة مبدع: نواب فالأغلبية والمعارضة تمردو ضد الحركة الشعبية وصوتو لمنافس مامعروفش لمنصب رئاسة لجنة العدل والتشريع وها النتائج بالأرقام ومصدر ل"كود": الأحرار مبغاوش يمشيو فالصدام وصوتو للحركة

كشفت جلسة التصويت على رئيس لجنة العدل والتشريع بمجلس النواب، مساء اليوم الاثنين 15 ماي الجاري، عن سابقة، باش صوتو 26 برلماني على مرشح لهاد المنصب جا فالدقائق الأخيرة غير ضدا فمرشح الحركة الشعبية سعيد سرار، اللي مشا ليهم المنصب بعد اعتقال محمد مبدع الرئيس السابق للجنة.
دبا الحركة الشعبية تقلقات ومبغاتش تحتج باش يدوز هاد التصويت بسلام خصوصا وأنه جاء بعد فضيحة ترشيح مبدع لرئاسة العدل والتشريع بإجماع المكتب السياسي للحركة الشعبية بقيادة محمد اوزين، اللي تحول ل"معارض" ماركسي هاد الأيام كيهضر باسم الطبقات الفقيرة ونسا بلي كان وزير وعليه تقارير كحلة.
طبعا الحركة الشعبية سكتات مدارتش احتجاج رغم أنه تم تقديم مرشح منافس ضدا فالأعراف لي كاينا بمجلس النواب، بحيث ان المنصب ديال الحركة بالتمثيلية لأنها فالمعارضة لي كترأس لجنة العدل والتشريع ديما.
دبا 26 نائب صوتو لصالح رؤوف عبدلاوي منعم، عن حزب جبهة القوى الديمقراطية، مرشح منافس دفع به حميد شباط، السياسي لي بغا يرجع للواجهة بأي طريق، عفريت في زمانه فاش كان فحزب الاستقلال. هاد التصويت خربق اللعب، الحركة الشعبية عرفات بلي هذا مساج سياسي.
عدد الأصوات المعبر عنها وصل ل177 صوت منها 9 ملغاة، جاب فيها مرشح الحركة 142 صوت والمرشح المنافس 26.
حسب مصدر "كود" كانت الحركة غادي تفقد هاد المنصب لو تم التصويت الأسبوع الماضي، بحيث كان الأحرار غادي يقلب الطاولة على أوزين ويدير عرف جديد فالبرلمان، لكن اليوم صوتو كاملين لصالح مرشح الحركة لسبب بسيط هو "احترام الفرقاء السياسيين والمؤسسات" حسب قيادي فالأحرار ل"كود".
قيادي فالحركة الشعبية استغرب كيفاش مرشح غير أسبوع هادي علن اصطفافه فالمعارضة وترشح ضد الحركة، مشككا في وجود "لعبة" تحيكها الأغلبية ضد الحركة الشعبية.