مؤتمر الحركة الشعبية بقات ليه يومين بلا دعم عمومي.. جمعو نصف مليار ب"دارت" وضعف التمويل حرج قيادات الحركة وحرب الصلاحيات بين لعنصر واوزين مستمرة

علمت "كود" أن قادة الحركة الشعبية، تالفين هاد الايام بسبب ضعف التمويل للمؤتمر الوطني ال14 لي غايكون يومي 25 و26 نونبر الجاري.
فحسب مصدر "كود" الحركة استطاعت تجمع نصف مليار -500 مليون-، وباقي كيدورو على الممولين باش يوصلو لأكثر من جوج مليار.
وقال مصدر فالحركة بلي كولشي تالف، خصوصا بعدما تأكد رسميا بلي مكاينش دعم عمومي لهاد المؤتمر، وداكشي لاش مشاو يديرو دارت.
وسبق لرئيس اللجنة التحضيرية للمؤتمر، ادريس السنتيسي، أن نفى وجود مشاكل مالية لهاد المؤتمر، ولكن مصادر من داخل اللجنة تؤكد ضعف التمويل وبلي عدد من صحاب الشكارة مبغاوش يميزو فهاد المؤتمر.
ضعف التمويل، حسب مصدر حركي، مرتبط بالترشيح لي كاين لي هو محمد اوزين، كاين لي رافضو داخل الحزب.
ومن المتوقع ان يشهد الحزب خلافات حول الصلاحيات بين الأمين العام المقبل (اوزين المرشح الأوفر حظا) وبين رئيس الحزب (امحند العنصر)، خصوصا فيما يتعلق بتدبير الملف الانتخابي.
الحركة الشعبية كتبقا استثناء فكولشي، مزال مبغاتش تقطع مع الزعيم الأبدي لي عمر على رأس الحزب أكثر من 35 سنة، وقررت ديرو رئيس الحزب وتعطيه الصلاحيات المتعلقة بالتحكيم في الانتخابات، أي الملف الأساسي ديال أي أمين حزب باغي يقود الحزب فالفترة ديالو.
هاد القضية تؤكد بلي الحركة الشعبية، بلاصت ماتمشي فالتطور باقا تقليدية ومبغاتش تحرر من قيود حراس المعبد. واخا دبا كاين محمد اوزين مرشح يكون امين عام، لكن بلا صلاحيات، كولشي بيد العنصر.
خبار كتباتها "كود" يوم الأحد حول صراعات الصلاحيات بين اوزين والعنصر، خلات الأخير يكعا ويقوليهم بلي بالغدر بدا بكري وانا مبغيتش باغي نولي حتا الرئيس، طبعا حراس المعبد مخلاوهش وقالو ليه خصك تبقا رمز وحدة الحزب، لأن اوزين مكاينش عليه اجماع.

دبا المؤتمر يلا داز ونجح، كيبقا السؤال شكون غادي يستقبلو سيدنا، فحالة طلع اوزين امين عام. واش اوزين ولا العنصر لي غادي تكون عندو الصفة الجديدة رئيس الحزب ؟. حزب بزوج ريوس؟ حالة ناذرة فالمشهد الحزبي المغربي. عبث حزبي وسياسي وصافي.
دبا المعارضة عندها زوج ريوس. اوزين كيعارض بشدة هاد الحكومة، واحد آخر لين ومكيبينش بلي معارض لي هو العنصر.