"كود" تنفرد بنشر مذكرات سقراط في السجن /الحلقة 29/ كابرييل صحراوي باسكي كيكره الفرنسيس وكيعشق مراكش: دوز شهرين فالحبس وهو يعلن الإسلام ديالو , الدراري اعتبرو هاد الشي نصر للاسلام بحال ايلى سلمات ميركل هو غير كابرييل كلو خواض وتريكيل

_غابرييل واش نتا صبليوني ؟
_ لا ...لا...أنا صحراوي أخاي .
_ هي مغريبي ..
_ لا ...لا ...صحراوي أخاي صحراوي .
_ هي نتا مع البوليزاريو أولد القحبة .
_ وا ز... , قوتلك صحراوي ... صحراوي .. وباسكوس.
أبوه إسباني من الباسك وأمه صحراوية من ولاد بن السبع , إزداد في الداخلة وهاجرها صغيرا الى بيلباو, ورث من أبيه عيونه الزرق ولون بشرته الأبيض, وجنون الباسكيين وورث من أمه نخوة ولاد بن السبع وكرمهم ورجولتهم, يملك حانة صغيرة في بيلباو, ومهنته بالإظافة الى السكر والعربدة وتعاطي المخدرات بشتى أنواعها, والعزف على الغيثار, هي تجارة المخدرات بين المغرب وباقي ربوع أوروبا , سجن عدة مرات وفي دول مختلفة , إيطاليا.. هولاندا.. ألمانيا.. وفرنسا.. وطبعا إسبانيا... والآن المغرب , يكره الفرنسيين وكل ما هو فرنسي , ميكميش كولواز واخا ينتاحر , ويعشق مراكش ويضع في ذراعه وشما بإسم المدينة , عمري شفت شي مراكشي واشم مراكش حتى شفت هاد الكاوري .
كان يتحدث دارجة مغربية شمالية, مع بعض المفردات البيضانصية, وأخرى باللهجة المراكشية, وكان عاشقا للروك , وبسباب هاد الموسيقى تعارفنا, كان كيجي عندي باش نعطيه إم بي 3 ديالي يتصنت لليد زبلن وأيسي دي سي وديب بوربل وبانك فلويد وآخرون, و غي كيركبها فوذنيه حتى كيفيق الجن لي فيه, وكيبانليك الترفع وكيغمض عينيه وكيبضى يضرب فالصولوات , ملي كيشبع كيقوليا هادي هي الموزيكا أخاي هادي هي الموزيكا .
كان كيبقى يعاودليا السهرات ديال الروك لي حضر, وعاودليا على روك إن ريو و روك إن مدريد وروك إن ليشبونة , وبحماس جداية الله يرحمها ملي جات كتعاودلينا على مقام النبي, ورمي الجمرات والصفى والمروة ويوم عرفة ( وا خلق ربي العالمين أبنيتي, تقولي كاع الدنيا مسلمة, وبحال الى مكاينينش النصارة أبنيتي, ومخلطين ها الكحلين ها الصفرين ها الشناوا وكولشي أبنيتي كولشي).
كان عامر تريكيل وحبيبيس عالمي, نهار شدوه فالمطار بالحشيش, سولوه منين شراه قاليهم من عند واحد سميتو محمد وكيكون فجامع لفنا ..كيقولها وكيضحك( المغرب كامل أخاي إسمو محمد .. يمشيو يقلبوا على محمد فجامع لفنا).
نهار حصل عندو البورطابل فالحبس وجاو البوليس باش يعمروليه, قاليهم شريتو من عند الموظف والمدير كيشوف .. قالو هاد ولد القحبة مريكل, وسيفطوه رجع بحالو للشامبري مابقاو عمرو لا محضر لا والو.
كان مندامج بزاف فالحبس نشيط وحيوي ومريكل, وديما الغوت والصداع والمطايفات وديما منوض هيلالة , فاللول باش يفوتوليه لمغاربة كرو , دوز شهرين معاهم وهو يعلن الإسلام ديالو , الدراري فالحبس فرحوا ليه وبداو كيتعاملوا معاه مزيان لي بغاها كيحضروهاليه, وكاين لي إعتبر الأمر نصرا للإسلام, بحال الى سلمات أنجيلا ميركل وهو غي غابرييل كلو خواض وتريكيل , ولا كينوض يصلي معاهم الفجر, جابوليه الدراري قرآن مترجم للفرنسية كاع مكان كيقراه, حيث مكيحملش لفرونسي, ولكن كان كيحلو مرة مرة باش يبان فالشامبر راه نيت سلم ...
دوز معاهم واحد الشوية حتى ولفوه مسلم وقلبوا ليه على كرو, وهو يقطع الصلاة , سولوه علاش قطعها قاليهم : الصلاة ديال الحبس مادايزاش, هادي غي صلاة الحاصلين, حتى للسيفيل وأرى ميصلي بنادم, ولا نتومة فالسيفيل كتقلبوها شراب وقحاب وإجرام حتى كتحصلوا وتجيو لهنا عاد كتفكرو ربي راه كاين ,.. لا أخاي أنا منكدبشي على سيدي ربي.( أفحمهم ولد لحرام)
ملي كانت كتكون لاعبة الريال والبارصة كيكون الشامبر مقصوم كحال باقي ربوع المملكة السعيدة, وهنا كيكون الروبيج والقمر والغوت والصداع, ومرة مرة لمطايفات, كتكون حرب صافي , غابرييل كان يخوض حربا خاصة بيه, كان كيسب الريال والبارصا, وكيغوت الماتش كلو ( فيفا تلاتيك دبيلباو, أخاي حنا معندناشي ملاعبي بمليار وجوج, حنا عندنا غي ولاد البلاد أخاي, غي الباسكوس, وهيداك كنحويو المدريد والبرسيلونة ) غي بوحدو كيغوت وممقمر ماوالو, ولكن داير الضجيج كعادته .
نهار كان خارج كان كاعي وبقا كيبكي, سولتوا ياك ماولفتي الحبس أمسخوط الواليدين قاليا : لا أخاي ..لا ... راه باقي ملي عنوصل لسبانيا عيشبروني, راه أصلا روشيرش حتى فسبانيا على مونتيف آخر, باقا تابعاني واحد عامين خرى أو تلتسنين.