شعلات بين فرق أسفل ترتيب البطولة.. طنجة وخريبكة ربحو والجديدة غرقات

زادت شعلت بين فرق البطولة الإحترافية اللي باغيا تصوفي من النزول إلى القسم الوطني الثاني على بعد 2 دورات من نهاية الموسم، وهذا الشي بعدما تلعبو ماتشات الدورة 28 اليوم السبت.
وقدر أولمبيك خريبكة يحقق رباح مهم ومفاجئ اليوم فتيران الفوسفاط، على المغرب التطواني بنتيجة 3 لزيرو، وجرو معه لحسابات أسفل الترتيب.
ونجح فريق إتحاد طنجة أنه يربح فريق الدفاع الحسني الجديدي وهو منافس مباشر له فالصراع على البقاء بالقسم الوطني الأول، وربحو بواحد لزيرو بطنجة.
اما مولودية وجدة خرج تعادل مع الرجاء الرياضي زيرو لزيرو، فالتيران ديال وجدة، وما قدرش يستغل خسران الخصوم ولكن النتجية ديال اليوم غتخله محتاج نقطة وحدة فالجوج ماتشات اللي جايين باش يصوفي.
نتائج اليوم بين فرق أسفل الترتيب، خلات الدفاع الحسني الجديدي يرجع إلى المركز الأخير برصيد 24 نقطة، وأولمبيك خريبكة يطلع المركز 15 برصيد 25 نقطة، واتحاد طنجة طلع للمركز 14 برصيد 27 نقطة، والمولودية الوجدية فالمركز 13 وعندها 29 نقطة.