حاجيتكم: على داك اللي من سلعة لاليمان.. واللي فلمارينا على لمغاربة داير فيها سبع.. وفوحر لمغاربة كلهم ملي مشا للميريكان..حيت بالكاو بان ضبع

كان أو كان.. فليام اللي كانو لمغاربة اللي يقعطو لبحور لبلاد الغربة و بالأخص لاليمان...نفرحو ليهم ونقولو صافي صوفاو..هادوك راهم سبوعا.. غادي يشرفو بينا..غير تسنى وشوف وسمع..
غادي يديرو مزية...يمشيو يقراو ويخدمو لبلاد من برا ويديرو لعجب.. إيكبرو ويكببرو بينا والمغرب يولي مفتاخر وللعديان كيخلع..
وفداك الزمان دالسذاجة اللي غيباتنا فيه أوروبا بالحلم الخاوي..اللي ما يداوي.. كنا نفرحو فيه ونقولو هاداك راهو ففرانسا وهاداك فهولاندا او سعدات اللي فالمريكان يتبرع.. زاد للبلاد الزينة راه صافي للبحور قطع..
خرجات شي عائلة من ريف لبلاد وقالت صافي حتى أنا نصوفي ونحرق للاليمان...نتكاثر ونتكاثف وندير الشبولا.. يوليو سبوعا والذكي فيهم يطير ويبدع..
ولدو ثلاثة دلعجولا..ياكلو غير السبولا... حتى دارو العضلات وحتارفو الرياضة والملاكم الواعر فيهم ربى الريش باش يقللع..
مشات إيام وجات ليالي ودارو شي مناورات ودخلو منافسات وتشهرو.. وحتى من الصغير فيهم ولا يسرط فالمال ويبلع..
واحد النهار من ليام الزينة...ربح لكبير فيهم شي ميدالية.. داتو للعالمية.. او ولا يقول صافي أنا وليت بحال الكروج..انا من الغلبة ما نشبع..
لمغاربة فرحو ليه ودارو الهليلة لكبيرة حيت لمغاربة ولاد الأصل يكبرو بلي يفوحر فيهم.. وملكهم متواضع يسلم ويوسم فاللي يرفع الراية كيف مادار مع المنتخب فالمنديال وبحال ما دار باه مع عويطة ونوال.. وغيرهم من اللي بقا متواضع وولد الأصل او بصح كان يبدع...
جمع بوبكر هلو وخوتو وباقي الزعيترات.. جاو للمارينا ودارو شي بيعة سمينة وقالو لبلاد ديالنا نديرو ما بغينا..حيت حنا مالين الشان والمرشان وجلسو يتشارعو وعلى كلب يتشانقو ويستعرضو العضلات و اللي هضر يتقمع..
بقاو لمغاربة يتعجبو و يقولو ويلي واش هادو نيت شبولا ولا عجولا؟ هادو قولبونا راهم ضبوعا.. ياكلو حب و تبن و يزيدوها بالزعيق و بالتحياح و يخلعو فينا.. راه حنا معاهم بالله و بالشرع..
ما بيديهم حيلة.. حيت لمغاربة ولاد الأصل وما يحبو مصارعة ولا مقارعة...او لاو يدعيو عليهم بالنهار وبالليل عالله الموجة اللي جابتهم ترجعهم مورا لبحورا وتدي وتدفع...
وفهاد النهار من ليام الزينة.. مشاو تاني باش يجيبو ميدالية يكيدو بها لعديان.. ولكن جابو الربحة وماشي فلاليمان..جابوها فبلاد الميريكان اللي رفعات راسنا وقالت لبلاد بلادكم والصحرا ديالكم واللي ما عجبو حال يضرب راسو مع الحيط ولا يتصرع...
فلاس فيغاس.. نزل عثمان للحلبة وهو محمر ومشمر ويقول أنا ليوما ننتاصر على داك الضبع.. ونوري للمغاربة اللي يعايروني ويدعو عليا بلي أنا باقي نغلب ونرجع للموغريب وناكل ونتبرع...
نفرح أنا وبا وخوتي... و نرجعو تاني للمارينا ونصولو ونجولو ونديرو ما دارو ولاد القايد الهاشمي أيام السيبة واللي ما عجبو حال يدير بحالنا ويقرع...
صفر الحكم و بدات مبارة الملاكمة بين الأرجنتيني والمغربي...يا حسرة اللي فالعادة يشجعوه لمغاربة إذا كان متواضع وضريف وأخلاقو زينة ماشي شينة..أما هاد خينا المنفوخ.. زرب عليه اللاتيني دغيا..او بالكاو فربعة تالدقايق قال ليه نوض تجمع..
انت هو الضبع.. منفوخ غا بالخاوي انت وخوتك وهلك.. وحتى من لمغاربة فرحو ليا وتفوحرو فيكم... حيت هما زمان مدو ليكم ليد وعضيتوها... انتوما ما فيكم نفع وسركم غير سير ودفع...
الحكمة اللي دارو لمغاربة ليوما.. حكمة كبيرة غادي تبقى مع الأجيال تنفع... باراكا من حلم فرانسا وأوروبا ولحريك... نبقاو فبلادنا ونقريو ولادنا.. نتيقو فالمغرب اللي يعلم التواضع و التسامح وحذاري من سلعة لاليمان راها فاللول سمن وعسل وفالتالي تتقلب حريكة ما تتبلع..