شنو لي حققات البوليساريو فالإنتخابات الإسبانية ؟

Elouali.zaz.1987@gmail.com
تسالات الانتخابات فإسبانيا البارح 23 يوليوز 2023، وربح الحزب الشعبي الإسباني بدون أغلبية وتحصل على 136 مقعد برلماني لي ما كافياش باش يشمل الحكومة وخاصة تحالفات كبيرة ومستحيلة إيديولوجيا تضمن ليه الحصول على 176 من أصل 350 باش يشمل الحكومة.
الإنتخابات البرلمانية الإسبانية كلشي كان كيتسناها بفارغ الصبر بحكم الصراع لي كان بين الحزب الشعبي الإسباني بقيادة ألبرتو نونيز فييخو وحزب العمال الإشتراكي بقيادة بيدرو سانشيث، وكلنا شفنا المناظرة بيناتهم والتصريحات من هنا ولهيه ولي كان لنزاع الصحرا حضور كبير فيها.
كلشي كيتسنى نتائج هاد الإنتخابات، المغرب من جهة والجزائر والبوليساريو من جهة أخرى. المغرب كيساين الحفاظ على نفس الموقف الداعم لمبادرة الحكم الذاتي كأساس وحيد لتسوية ملف الصحراء الى ربح بيدرو سانشيث، والجزائر والبوليساريو كيساينو الحزب الشعبي يربح ويغير هداك الموقف.
ما علينا دابا من المغرب. السؤال هو شنو لي حققات البوليساريو والجزائر من هاد الإنتخابات ؟
الجواب فإطارو العام هو والو لأن تشكيل الحكومة ما يمكنش دابا وفرص حزب العمال الإشتراكي بقيادة بيدرو سانشيث أكبر بحكم أنه يمكن يحصل على الأغلبية بسباب أن الأحزاب الأخرى لي ممكن يتحالف معاها كبها عندها مرجعية يسارية، بينما الحزب الشعبي لي داعم البوليساريو ممكن يتحالف فقط مع "ڤوكس" وواخا يتحالفو ما غاديش يوصلو لعتبة 176 مقعد باش يصاوبو الحكومة، والمجموع عندهم هو 169 فيها 136 ديال الحزب الشعبي و 33 ديال "ڤوكس"، علما أنه لا يمكن بأي حال من الأحوال أن التحالف يكون بين أحزاب اليمين واليسار أو يتخلى شي حد فالاحزاب اليسارية على إيديولوجيتو باش يدخل الحكومة اليمينية الجاية.
النتائج لي حققاتها البوليساريو كتبقى محدودة، ولي هي دخول أول نائبة برلمانية من أصول صحراوية للكونگرس، وكيتعلق الأمر بتكبر سيدي لي نجحات مع إئتلاف "سومار" فمدريد، بالإضافة لتمكن حزب اليسار الباسكي القومي EH BILDU الداعم للبوليساريو من الفوز ب 6 مقاعد.
هاد النتائج ممكن يكون عندها تأثير ولكن كيبقى محدود بزاف وما يقدرش يساهم فتغيير الموقف الإسباني الداعم لمبادرة الحكم الذاتي في حالة ما تمكن بيدرو سانشيث من تشكيل الحكومة الإسبانية الجاية.