العلاقات المغربية الصبليونية ما واقفاش على الصح . سياسيو الجارة الشمالية كيشوفو بلادنا ديكتاتورية مستعمرة مهددة لامن بلادهم. كيفاش كلهم فالبرلمان شيطنونا

هاد الصباح 19 ابريل 2023 كان بيدرو سانشيث رئيس الحكومة الصبليوني فجلسة مساءلة فالبرلمان ديالهم اليوم الاربعاء.
سانشيث دافع على التقارب المغربي الصبليوني. هدر على بلادنا كحليف مهم وباللي العلاقات مزيانة مبنية على الاحترام المتبادل.
هاد التصريح جبد عليه النحل. كلشي الاحزاب السياسية٬ الصغيرة والكبيرة٬ القومية والجهوية. الجمهورية والملكية.... كلشي كلشي هاجم هاد السياسة الجديدة لسانشيث خاصة بخصوص تغيير مدريد موقفها من الصحرا ودعمها للحكم الذاتي.
وصفو سانشيث بالخائن لسياسة اسبانيا التقليدية. اعتبروه رهينة فيد محمد السادس وفيد المملكة المغربية. هاد الشي فيه الحزب الشعبي المعارض حزب بوديموس المشارك فالحكومة والحزب الجمهوري الكاتالاني الداعم للحكومة بدون مشاركة واحزاب كاتالونيا الداعمين للانفصالل وبيلدو الحزب الباسكي المطالب بالانفصال وحتى تحالف "كناريا"٬ كلشي كلشي ضدنا.
جبدو تصريح النعم ميارة رئيس مجلس المستشارين اللي هدر على استرجاع سبتة ومليلية قبل ما ينفي هاد التصريح٬ اعتابروه تهديد لبلادهم.
هاد السياسيين صورو المغرب كوحش غادي يهجم عليهم وكيهدد امنهم. صورونا كبلاد ما فيها حقوق ولا حريات وتستحق الوصاية. صورونا بلاد كيبتز ما فيه ثقة. شفنا سياسيين دافعو على الجزائر واكثر على البوليساريو وباستماتة.
مع هاد السياسيين ما كاينش مستقبل. طبعا تصريحات فيها السياسة ولكن كتعطي صورة على السياسي الاسباني على ممثل الشعب. كلشي مع البوليساريو. كلشي من اليمين الراديكالي حتى اليسار الراديكالي ما كرهوش يحتلو المغرب ويديرو وصاية عليه.
اللي جا فالبرلمان اليوم خطير. المستقبل ما يضمنو حد. التعامل معاهم خاصو يكون حذر بزاف. فيوم سولات "كود" واحد من اشهر وزراء الخارجية فتاريخ المغرب على الاعتراف بمغربية الصحرا من قبل هاد الحكومة الصبليونية٬ الوزير الاسبق اعتابر هاد القرار تاريخي واهم من ديال ميريكان ولكن حذر من الصبليون. من ساسة الصبليون. التحذير اللي حذرنا منو شفناه اليوم فالبرلمان. لا ثقة معاهم. خاص ديما نكونو واجدين لكلشي معاهم.
لمغاربة ما عمرهم وظفو الملف الكاتالاني ولا الباسكي ضد اسبانيا. باش تشوف اللي وقع اليوم٬ خاص يوجدو كاع لوراق. غدا ممكن يوقع شي تحول فموقف الديبلوماسية الصبليونية وخاصنا نكونو واجدين