إنفانتينو رئيس الفيفا: كنساند المغربية بنزينة اللي دخلت لتاريخ المونديال بحجابها ولا للتمييز

عبر رئيس الاتحاد الدولى لكرة القدم جياني إنفانتينو على الدعم ديالو لخطوة لاعبة المنتخب الوطني المغربي نهيلة بنزيلة، اللي ولات أول امرأة كتلعب كأس العالم بالحجاب، وهاد الشي خلال ماتش ليكيب ناسيونال أمام منتخب كوريا يوم الأحد فمونديال 2023، بأستراليا ونيوزيلندا.
رئيس الاتحاد الدولي لكرة القدم جياني إنفانتينو، خرج وتفاعل مع البوز اللي بدا من صباح الأحد فاش دخلت نهيلة بنزيلة مع صحباتها بالمنتخب المغربي لماتش كوريا الجنوبية وهي دايرا الحجاب ونشر صور د بنزيلة عندو فأنستغرام وقال: "ولات نهيلة بنزينة أول لاعبة كترتدي الحجاب في إحدى مباريات كأس العالم للسيدات، راه كرة القدم شاملة ومتسامحة وعالمية ومتنوعة، لا للتمييز".
وكيجي الدعم ديال رئيس الفيفا جياني إنفانتينو لنجمة المنتخب الوطني المغربي النسوي، بمثابة تصرفيقة لشي وحدين منتشرين بعدد من دول العالم اللي بداو كيتنمرو عليها، حيث اختارت أنها تلبس الحجاب وتلعب به، واخا أغلبهم كيدعي الدفاع عن الحريات الفردية وغيرها من شعارات الحداثة، ولكن كيبغيو يفرضو أفكارهم على الجميع، وهذا غلط، حيث كل واحد حر فراسو يلبس يشرب ياكل يدير اللي بغا بشرط أنه ما يمسش حريات الآخرين، وراه بنزيلة ولاعبات المنتخب المغرب كيضربو المثل ديال التنوع، حيث كل وحدة فيهن دايرة داكشي اللي بغات حسب اختيارها وحريتها، وكيوحدهن التوني د المغرب والضرابو ديال المملكة المغربية اللي كتجمع بين العراقة والأصالة والحداثة والمعاصرة.