المغاربة مثال فالإنسانية والعطف: كاين لي باع ذكرياتو باش يعاون وكاين لي تقاسم حليب ولدو مع الولاد المتضررين وكاينة المرأة لي تبرعات بجلابتها ولي عطا غطاه لخوه المغربي

Elouali.zaz.1987@gmail.com
الفاجعة لي ضربات المفرب وخلفات الآلاف ديال الضحايا عطاتنا درس مبير فالإنسانية والاخوة والتضامن، عطات للعالم كلو صورة مزيانة بزاف على المغرب وشعبو المحب للخير ولي مستاعد يضحي بأي شيء باش يعاون ويوقف مع خوتو فينما كانوا.
شفنا بزاف ديال التلاحم بزاف ديال التراحم بزاف ديال الكرم والجود لي عي صفات ديال المغاربة، شفنا دراري صغار كيتبرعو شفنا رجال شفنا عيالات وشيوخ كيتسابقو للخير والمعونة، كلها وجهدو وكلها بلي عندو والمثل كيقول "الجود بالموجود"، ممكن حاحة بسيطة تعاون بيها، ممكم حاجة تافهة بالنسبة لأي واحد تكون سباب فتعتق روح، وماين لي عطا أكثر الفلوس وكاين لي عطا مساعدات عينية، وكاين لي عطا أعز حاجة عندو وما ترددش، وهذا هو نموذج الشعب المغربي.
كاين المغربي لي عطا "كاشة" ديالو، كاين المغربي لي عطا الفراش لي كيتفرش والمخاد، كاين لي تفكر الدراري الصغار وقسم الحليب ديال ولدو مع الدراري المتضررين، كاين عطات جلابتها باش تكسي مغربية ختها فعادوك الدواوير، كاين الشيباني لي السجادة ديالو باش كيصلي، وكاين وكاين وكاين وهذا هو المغربي بشهامتو.
كاينة أمثلة بزاف خلاتنا نوقفو ليها إحتراما وتقديرا، امثلة خلاتنا نتعلمو من الحياة درس إنساني يحرك المشاعر، من بين هاد الناس حالات خاصة لي من ضمنهم الفاعلة المدنية، هنية نجيم مالكي، لي حطات البراسلي ديال الذهب ديالها دون تردد وتبرعات بعائد بيعو للمتضررين، واخا كان كيمثل شي حاجة خاصة بالنسبة ليها وشراتو كيف قالت فتدوينة فيسبوكية عن عشق وحب كبير.
كاين مثال آخر على الشهامة المغربية لي جسدوه جوج من ابناء هاد الوطن وهوما كيف كيعَرْفو أنفسهم فالفيسبوك كل من علي الكراكبي والحاج منير، هاد جوج شباب فكرو خارج الصندوق، وبمبادرة منهم أعادوا تشغيل الضو بإستعمال بطاريات و الإنترنيت عبر الأقمار الإصطناعية SpaceX و شبكة Starlink في بؤرة الزلزال في إفورير، باش يفسحو المجال أمام الناس تتواصل مع أهاليها وحبابها ويعاونون طواقم الإنقاذ فخدمتهم لي مرتابطة بالضو والهاتف والانترنت.
من بين الأمثلة، كاين سائقين ديال رموكات وديال شاحنات خصصو شاحناتهم لنقل المساعدات، انطالقو من أبعد النقاط بحال الگرگرات و الداخلة والعيون وكلميم ومن طنحة وتطوان ووجدة وكل مناطق المغرب وهادشي بدون مقابل، فقط باش يعاونو ووقفو مع خوتهم المغاربة.
مول مخبزة أيضا فمولاي بوعزة فإقايم خنيفرة، قال بأنه قادر يوجد 4000 خبزة وطلب الناس تعاونو فالنقل ديال هاد الكمية للمتضررين من الزلزال بلا ما يفكر وبلا ما يتردد، وكاين مول مخبزة آخر فكلميم حتى هو قرر يتبرع ب 300 خبزة وهادشي على ود خوتهم المغاربة.
كاينين أمثلة بزاف على تلاحم المغاربة، وكل شرائح المجتمع عطات لي تقدر عليه، فيهم لي عطا دمو وتبرعو بيه، وكاين حلاقين تجمعوا يعاونو وكاينين شيافر طاكسيات هزو المساعدات، كاين فلاحة تعاونو، كاين جيران تنافسو يتعاونو وحلو ديورهم للمتضررين والعائلات لي بلا مأوى.
الأكثر من ذلك عطف المغاربة وتفكيرهم تجاوز الإنسان ولاو كيفكرو حتى فالحيوانات لي طالبو بتوفير الغذاء ليها ووجهو الناس باش ما تنساهمش من المساعدات لأنهم حتى هوما أرواح عندها الحق فأنها تعيش بحال الإنسان.