علماء: الضوء اللي شافوه الناس قبل الزلزال فالمغرب يقدر يكون حقيقي لان الزلزال يقدر ينتج ظواهر ضوئية

قال موقع " واشنطن بوسط" ان الناس فمواقع التواصل الاجتماعي قالو انه بانت ضواو فشكل فالسماء قبل مايضرب الزلزال فالمغرب.
واضاف الموقع الامريكي ان العلماء اكدو بلي الضوء اللي شافو الناس ممكن يكون حقيقي وقالو ان الزلازل ممكن ينتج ظواهر ضوئية مختلفة فالغلاف الجوي حيث كيدير تغيرات كهربائية تحت الغلاف الجوي
وفهاد السياق قال عالم الجيوفيزياء فريدمان فرويند: الزلزال وقع فالمغرب بالليل بمعنى ان الناس كان ساهل عليهم يشوفو الضوء ويصوروه.
واضاف انه ممكن ربط العديد من الظواهر الضوئية المختلفة بالزلازل، فحال البرق حتى هو أمر شائع، وشرح انه كينتقل البرق الزلزالي من الأرض للسحابة، وكيتم تنشيطو بواسطة الشحنات الكهربائية المرتبطة بالنشاط الزلزالي داخل الأرض.
ووضح ان "أضواء الزلزال" كتتولد من حركة الصفائح التكتونية للزلزال، ويمكن تبان على شكل توهجات ثابتة، أو كرات من الضوء، أو أشرطة أو برق، وفقا لهيئة المسح الجيولوجي الأمريكية.
كيشرح فريدمان أن كوكب الارض موصل للكهرباء، و القوى الزلزالية أو التكتونية كتشوه الصخور والمعادن اللي كاينة فالقشرة الأرضية، الشئ اللي كيسمح بتدفق التيارات الكهربائية، وبالتالي كتتراكم هاد الشحنات، وكتجذب الشحنات الموجبة فالصخور الجزيئات السالبة الشحنة فالغلاف الجوي العلوي للأرض وكيقدرو ينتجو الضوء.
وقال فريدمان، اللي سبق ليه نشر دراسات على الزلازل وأضواء الزلازل، انه الى ضرب الزلزال بالليل يقدر يكون الضوء مجهد بزاف وفسر لون الضوء انه كيجي من نوع الذرة المثارة فالغلاف الجوي، مثلا يمكن لجزيئات الأكسجين تعطي ضوء حمر ولا خضر ،و لكن خليط بيناتهم يقدر يعطي ضوء صفر.
وقال عالم الزلازل جون إيبل أستاذ الجيوفيزياء في كلية بوسطن حتى هو أضواء الزلازل حقيقية حيث قرا تقارير كترجع للقرن الثامن عشر قبل إنشاء الأنظمة الكهربائية.
https://www.washingtonpost.com/climate-environment/2023/09/11/earthquake-lights-flash-explained-morocco/