فانتظار الاعلان الرسمي.. المغرب فافوري باش يربح تنظيم كاس افريقيا 2025

كيتجه المغرب بخطوات ثابتة نحو تنظيم كاس افريقيا للامم 2025، وهذا الشي في انتظار الاعلام الرسمي فقط على الفوز ديالو باستضافة المسابقة الرياضية الاهم فالقارة الافريقية.
وكشفت مصادر مطلعة، ان المغرب والجامعة الملكية المغربية لكرة القدم قدرو يقنعو الاتحاد الافريقي واغلب الاتحادات المحلية بالقارة الافريقية بقوة الملف المغربي لتنظيم كاس افريقيا 2025، وكاينة ثقة كبيرة منهم فالمملكة المغربية لانجاح اهم بطولة رياضية إفريقية.
نفس المصادر كتقول أن تنظيم المغرب لكاس افريقيا 2025، محسوم حيث الملف ديالو تفوق على باقي المنافسين في اقناع الافارقة، في انتظار فقط الجمعية العمومية ديال الاتحاد الافريقي اللي غتكون نهاية شهر شتنبر الحالي للإعلان على مستضيف نسخة 2025 ونسخة 2027.
المصادر ذاتها، أكدت أن الجزائر اقتنعت بلي ما تقدرش تنافس المغرب على تنظيم كاس افريقيا 2025، ودابا مركزة على ترشحها لتنظم نسخة 2027، باش تحفظ ما الوجه، بعدما عرفت انها خاسرة أمام المغرب، وان ترشحها لاستضافة نسخة 2025، ولا دابا غير بالسمية وصافي وما قادرات تعلن انسحابها باش ما تفرش ويؤثر هذا الشي حتى على حظوظها في تنظم نسخة 2027.
وغيعلن الاتحاد الافريقي خلال اجتماع المكتب التنفيذي ديالو يوم الاربعاء الجاي الموافق 27 شتنبر الحالي بالعاصمة المصرية القاهرة، على البلد اللي غيربح تنظم نسخة 2025 ونسخة 2027 من كاس افريقيا، وكان دائما المغرب وملي علن الترشح ديالو لتنظيم نسخة 2025، هو المرشح الاقوى لاستضافة البطولة، وهذا الشي خلا الجزائر اللي ترشحت من وراه لتنظم نفس النسخة، تمشي تقدم ترشح اخر لتنظيم نسخة 2027.