مقربلة فإسبانيا بسبب البارصا والتحكيم والرشوة ورئيس الليكا كيتاهم ريال مدريد

نايضة فاسبانيا بسبب قضية البارصا والتحكيم والاتهامات بالرشوة، وهذا الشي وصلت ريحتو حتى لريال مدريد، ومسؤول فالكرة الإسبانية كيتهم فريق العاصمة مدريد أنه باغي يستافد من هذا القيامة اللي نايضة.
وفتصريح له نقلاتو جريدة "ماركا" الإسبانية، استغرب خافيير تيباس رئيس الليكا الإسبانية وهو محامي فنفس الوقت، (استغرب) من البلبلة اللي مازال نايضة على قضية نكريرا اللي متهم فيها البارصا حتى لدابا بتقديم الرشوة فالسنوات الماضية لحكام باش يسهلو عليه يربح الماتشات، ومجرورين فيها رؤساء سابقين وحكام.
رئيس رابطة لاليكا، ناض لريال مدريد الغريم التقليدي ديال البارصا، واتهم القناة الرسمية د ريال مدريد بالضغط الاعلامي فقضية نيكريرا، والاكثر من هذا الشي اتهم القناة بتقديم تقارير وصور مغلوطة وأن هذا الشي اللي دارو خارج على معايير اللعب النظيف، وأن المسؤولين د قناة ريال مدريد خاصهم يحترمو قوانين الاعلام الاسباني اللي واضعاها المؤسسات المسؤولة عليه.
ودارت السلطات الإسبانية اليوم الخميس مداهمة لمقر الاتحاد الإسباني لكرة القدم ومقر البارصا، للاشتباه بلي البارصاويين عطاو رشوة للحكام فقضية فساد التحكيم عرفتها الكرة الإسبانية خلال العشرين العام الماضية.