لاعبين الوداد ل "كود": واجدين للفينال ضد صن داونز.. باغيين نربحو السوبر ليك ونهديوه لفلوح وكاع الوداديين

اكدو لاعبين الوداد الرياضي انهم واجدين باش يتاقتلو على كاس السوبر ليك ويهديوه لروح صاحبهم اسامة فلوح وكاع الوداديين، وان الفريق واجد لذهاب النهائي غدا الاحد ضد صن داونز الجنوب إفريقي فستاد دونور.
وقال الشرقي البحري لاعب الوداد الرياضي فتصريح لموقع "كود": "الدراري كاملين عارفين المسؤولية اللي عليهم وصلنا لهذا الفينال وكنمثلو فيه المغرب والمغاربة كاملين غيكونو بقلوبهم معنا".
وكمل البحري: "باغيين ندوزو ماتش مزيان فكازا اللي يخلينا نلعبو مرتاحين فجنوب أفريقيا باش نجيبو هذا الكاس وتكون اول نسخة منو مغربية".
اما يحيى جبران كابيتان الوداد الرياضي قال لموقع "كود": " الاستعدادات كتدوز فأجواء جيدة وفروح ديال المسؤولية والماتش ديال الفينال ما كايحتاجش لتحفيز كلشي مستعد وكلشي موجد".
وزاد اكد جبران: "اي ودادي ومغربي كيتمنى يربح هذا اللقب وخاصنا نديرو اي حاجة باش نربحوه خصوصا فهاد الوقت اللي افتقدنا فيها اسامة فلوح الأخ ديالنا وعنصر من العائلة".