لاعبين الوداد ل"كود": غنمشيو نربحو صن داونز فتيرانهم ونجيبو كوب السوبر ليك من جنوب إفريقيا ونفرحو جمهورنا

عبرو لاعبين الوداد الرياضي على الرغبة ديالهم فتحقيق الرباح فماتش إياب فينال السوبر ليك الإفريقي على ماميلودي صن داونز فتيرانو ويرجعو بلاكوب من جنوب إفريقيا.
وقال جمال حركاس فتصريح له ل"كود" بعد فوز الوداد على صن داونز فذهاب السوبر ليك الإفريقي بجوج لواحد فدونور: "هذا الماتش قدرنا نربحوه قدام جمهورنا مازال ماتش الروتور غنخدمو عليه هاد السيمانة وغنحاولو نمشيو نربحو تما ونجيبو لاكوب".
محمد أوناجم لاعب الوداد حتى هو قال لموقع "كود": "الحمد لله على هذه النتيجة دابا الشوط الأول سالا هنا، كنا كنطمحو ما يتماركاش علينا ونسجلو أكبر عدد من الأهداف.. تسجل علينا بقينا مؤمنين بلي غنماركيو وسجلنا الهدف الثاني".
وأكد أوناجم: "دابا هذا الماتش غنساوه وغنفكرو فالروتور، عندنا يوم راحة ونبداو نستعدو للماتش ديال جنوب إفريقيا باغيين نجيبو لاكوب من تماك ونفرحو جمهورنا".