واش معهد الصحافة "ليزيگ" ولى مدعشش؟ جابو اللي حرض على الصحفيين فيهم خريج نفس المعهد وسبهم فطنجة وكيوصف مستشار الملك ازولاي لي باغي يخرب البلاد فندوة مشارك فيها حتى متطرف سلفي معروف فاليوتيب

اش واقع فالمعهد العالي للاعلام والاتصال التابع للدولة "ليزيگ" تا وصلت به الدرجة (وفق منشور ديالهم) يستضف شخصيات كتحرض ضد الصحفيين وتسبهم وتخونهم. كتستاضف اللي بغى يجري على هاد الصحافيين من لبلاد ودعا حتى يتمحاو كيف جا فشعارات طنجة مساندة ل"حماس" ماشي للقضية الفلسطينية. نفس النشاط اللي غادي يكون غدا لاربعا كيستاضف سلفي عندو افكار متحجرة، كيفاش وشنو طرا حتى ولا هاد المعهد ملحقة لقناة الجزيرة" القطرية الاخوانية باش تجيب واحد كيدير الدعاية لهاد القناة فالمغرب باش يهضر على الاعلام وفلسطين .
المعهد باغي ينظم ندوة نهار الاربعاء، غادي يشارك فيها واحد كيحمل افكار غبية ومتطرفة في آن واحد سميتو عزيز هناوي، اللي كيدعم حركة حماس وضد السلطة الفلسطينية، واللي رفع شعارات ضد الصحفيين فطنجة ووصفهم باقبح النعوث وبالعملاء وووو وخدام الصهيونية. دبا شنو يدير واحد داير حملة "ترهيب" ضد الصحفيين بمجرد انهم تعاملوا مع الاسرائيليين (مهنيا)، علما ان جميع القطاعات الحكومي بما فيها القطاع فاش خدام هو (حسب ما يراج) موقع اتفاقيات مع نظيراتها الاسرائيلية.
هناوي كيعتبر مستشار الملك اندري ازولاي داخل فمخطط تخريبي ضد النظام، ووو الغباء اللي معندوش حدود، التعصب الديني والفكري اللي كيأدي للعنف، واي تصريحات كيطلقها هاد خونا ممكن ياخدها شي حد بجدية ويكر بالاعتداء على الصحفيين اللي خونهم او المستشار ازولاي. الاخطر من ذلك هاد المؤسسة غادي تحتضن فقيه معروف فاليوتيب، متطرف فكريا وعندو شي اراء غبية مؤدلجة بحال ياسين العمري وغيرهم من السلفية المتطرفة اللي ضد الحياة.
النشاط منظمو "مكتب الطلبة" بالمعهد العريق للي تحكم فيه دابا "العدل والاحسان" وباش كتبان ميولاتهم شوفو غير الضيوف لهاد النشاط اللي غادي يكون غدا فالعشية فمدرج نفس المعهد:
محمد طلال لحلو قاليك مدقق شرعي ودكتور فالاقتصاد. اش من علاقة بالاعلام؟ سولو المنظمين وكاين كيف قلنا اللي تخصص فسب الصحافيين الاخواني الهوا عزيز هناوي. ولا علاقة بالصحافة الا من خلال تخصصو فسبها وتوزيع الوطنية على صحافيين اكثر وطنية منو واكثر حب لبلادهم من واحد ما كيآمنش بالدولة الوطنية. وكاين سفير فلسطين بالمغرب وصحافي من "الجزيرة" القطرية الاخوانية اللي دولتهم دايرة علاقة مع اسرائيل ولكن حتى شي من عمالها =حقاش فقطر كيكونو عمال ماشي صحافيين= ما يقدر يهدر على هاد الشي.
كيبان هاد القرار ديال تنظيم هاد الشي فالمعهد فيه نوع من الرد على بلاغ دارتو "جمعية خريجي المعهد العالي للإعلام والاتصال" اللي رد على على مقطع فيديو من مسيرة نظمت بطنجة، تضامنا مع الشعب الفلسطيني. المقطع كولو دعوات للشهير والتحريض والكراهية ضد "خريج المعهد الصحفي رضوان الرمضاني".
الجمعية عبرات على تضامنها مع الصحافي ورفضات "هذا النوع من المواقف المحرضة، التي تعتبر سابقة خطيرة تخفي وراءها رغبة بعض الجهات في تكميم الأفواه التي لا تتفق معها، تحت ذريعة التضامن مع الشعب الفلسطيني".
كانت ضد المس بالسلامة الجسدية للصحافيين وطلبة من نفس المعهد ديال المكتب الحالي اللي عندهم انتماء سياسي اخواني ردو عليهم وجابو اللي كيسبو الصحافي للمعهد. خطير هاد الشي