راكم كدعمو التطرف والتشدد يا وزراء ويا مسؤولين. كيفاش والي بنك المغرب ووزراء فالحكومة شاركو فحفل تخرج طلبة جامعة الاخوين وهاد الجامعة كتستاضف متشددين امثال العمري

البارح السبت تبندر رئيس جامعة الاخوين اللي سميتو امين بنسعيد ومعاه اعضاء امناء المجلس اللي فيهم وزراء مدراء مؤسسات عمومية وخاصة. كلهم كيفرنسو وفرحانين بلا حيا بلا حشمة. حضورهم ومنحهم ديبلومات للطلبة والطالبات هو دعم لتوجهات هاد الجامعة اللي سالات مرحلة الانفتاح ودخلات مرحلة المحافظة والتقليد. هاد المرحلة بدات بعد طرد استاذ امريكي لانو مثلي وسالات بالاستقبال الجامعة من ساسها لراسها لاحد شيوخ الظلام ياسين العمري قبل اشهر.
نفس المدرج اللي جابت ليه الجامعة =باراكا من لكذوب راه نشاط طلابي راها ما شاداش= هو اللي دار فيه حفل حضر ليه هاداك بنسعيد وعبد اللطيف لجواهري والي بنك المغرب ووزراء ومدراء مؤسسات .. كلهم اعضاء فمجلس امناء الجامعة.
الهدرة على التخرج وعلى القراية خاوية. اللي غاب هو وقف الدعم الامريكي بعد لفضايح اللي عرفاتها الجامعة. هو التحول لكبير باش ولات الجامعة وكر لشيوخ الظلام. تصورو كلية الاداب والعلوم الانسانية بنمسيك فكازا واللي عامرة خوانجية ما قدراتش تستاضف هاد الشيخ وداروه عن بعد وجامعة الاخوين اللي فيها هادوك اللي كيفرنسو جابوه ودار محاضرة والطلبة باسو راس هاداك المتطرف والبارح وكأن شيئا لم يكن. الدنيا هانية مرحبا بشيوخ الظلام
اييه كان حفل تاريخي يا هاداك اللي سميتو امين بنسعيد لانو دار فسنة اسقبلتي فيه متطرف. فرحتي بيه وكبرتي بيه. بغيتي تدخل للتاريخ اكثر واستاضف شي داعشي كبير العام الجاي.
بحال هاد الجامعة خاص الدولة توقف عليها الدعم. راه كل عضو من اعضاء مجلس امناء الجامعة داعم لهاد التحركات طالما ما قال والو ما عبرش علي رفضو لهاد المسار اللي كتعرفو الاخوين