حاجيتكم: على داك بنزيدان اللي ملي كاينوي يديرها زينة.. كيبقى يزيد فالما.. حتى كيهرري لميمتو لعجينة و يخليها تالفة مسكينة بالروينة

كان أوكان فإيام غزة الزينة...غزة اللي الناس من زمان يحكيو و يتحاكاو عليها و يديرو الأغاني الثورية و الأخرى لحنينة.
يقولو أرض المقاومة عنوان الجسارة، بلاد الحماس و الشباب اللي من المعدن القوي و اللي من أحسن طينة..
من زمان النكبة و هي تمشي أيام و تجي أيام و الكر و الفر و الحرب و لقتيلة و تجي لهدنة... و ترجع تاني تزعزع السفينة
العالم يدعي للسلام و يقول صافي راها المشاورات هي الحل و المعادلة فيها جوج بلدان و فلسطين عاصمتها القدس الشرقية و الكل يخزيو الشيطان و عايلتو اللعينة
لكن فيوم من أيام أكتوبر الشينة.. ناضت تاني لقتيلة و المشاوارات و عملية السلام توقفت.. و ناض التهلال و التطبال و الغوت في كل قرية فالعالم و كل مدينة..
اللي يقول لخوانجية دحماس علاش يقتلو المدنيين و اللي يدعي ربو و يقول الله يهديهم و يهدينا..
و اللي يقول إسرائيل داية الأرض و معدية من زمان و غير الله يحمينا...و اللي يقول من حق إسرائيل تنتاقم حيت أولادهم حتى هما راهم لحماس رهينة...و اللي بحالنا جالس يستنى.. و حتى حنا سكتنا و كاع ما دوينا...
و لكن الغالب الله.. راه ديما هاد لخوانجية يجيو يخرجونا على طوعنا و بزز يخرجونا من سكوتنا...و عفريتهم بن زيدان حالف ما يخرس و يدخل للقنينة..
و فوسط هاد الروينة..يجيو حتى جماعة العدل و الإحسان..رباعة أفغانستان و إيران..مالين فكر الأمة اللي ما عندها حدود ما عندها وطن و اللي يقول يحبو فلسطين كثر منا... أو واقيلا أكثر حتى من هلها نفسهم اللي عايشين فقلب الإشتباك و لقرينة..
يخرجو يغوتو و يصهللو و يعايرو و يهجمو على المستشار بلا حشمة...كيف ما عادتهم يموتو على الفتنة و ديما يخرجو الضغينة الدفينة..
مالين الجماعة ولاو محتلين الساحة و ردوها للتبراح و التبجاح عرينة....يدورو و يحوصو..و للمسكة دغزة يلوكو..حيت هاد ليام كلشي متاجه ليها و يقول هاد المسكة حتى حنا نمضغوها راها مسكرة و بنينة...
ولاد عمهم الإخوان دالإصلاح و التوحيد وليدات العدالة و التنمية..يسكتو؟ لااااا عييييب!!! هاد قضية غزة راها باقي فيها ما يدار..راها كعكة زينة...
ينوض سي بنكيران أمين عام الإخوان اللي يحب ديما يضرب جوج عصافير.. بحجرة وحدة للعوينة...يقول للمخزن شوفوني راني ضريف..راني معاكم و عليهم..ديما نزاحم ليكم هاد جماعة إيران لخشينة...ولكن فنفس الوقت هو راه يصبغ فصحابو فقطر و تركيا و يعطينا بالحجر حنا للسنينة..
يبكي وينوح و يذرف الدموع و يقول وااا ميمتي لحنينة...خاصنا ندقو لوتد..و خوتنا 'حماس' فغزة خصنا حنا نكونو ليهم مسند.. و ما نخليوش هاد عدلاوا يبانو وحدهم فالحلبة و ياكلو هاد البقرة السمينة...
و كيفما عودنا سي بن زيدان بو لفعاليل غير يا فمي و ما جاب...ركاع كي ديما و لوغتو رعينة...
بدل ما يبقى فالتنديد بسياسات الدول و يطالب بإيقاف العنف كيف مالين لعقلية لحصينة..ينوض هو يغلط فليهود و يشوهنا مسخوط... و حتى من لوموند كتبات علينا...
خداتو شي حاجة ما عرفناها واش لهبال و لا الحماسة حيت هو كي ديما يبغي يبان بدموع التماسيح و الإبتزاز العاطفي و يزيد مليحة و بزيرة و يطيح علينا لغبينة...
و بعد الدموع هاجم و عاير و نسى راسو و هاد لمرة يطيح فالمحظور.. يقول السبة اللعينة...و يزلق فمعاداة السامية الممنوعة دوليا من أيام الهولوكوست الشينة...
يروج دابا بلي جوج جمعيات دولية غادي تدعيه.. وحدة ففرانسا و الأخرى فالميريكان!!...إيه يا سيادنا...فالميريكان اللي قالت الصحرا مغربية بالهدوء و السكينة....و فيناهو داك مشعل ديال حماس اللي حل دركومو علينا؟... و قضيتنا ما شار ليها واخا غير بالفن و هو بلا حشمة يخاطب فينا...
هاد المرة سي بن كيران قفرتيها....راك نسيتي بلي المغرب ماتابعش للأمة اللي يدوي عليها صاحبك مشعل اللي حل فمو علينا.. المغرب راه واطن عندو حدود و فيه العربية و الأمازيغية و الحسانية و حتى العبرية..راهو بهاد الإختلاف هو بلاد متينة..
سير حاول تفكها راك كعورتيها ودرتيها شينة..حيت انت و الإخوان كيف ديما...راكم تكترو الماء و تنساو الطحينة...حتى تخرج شي حاجة غريبة ما هي عجينة...لا هي طينة.