خطأ ما يمكنش يتصحح وصحاب "العدل" عينهم يسقطو النظام. كيفاش الحكومة ساهمات ف"قتل" بنموسى سياسيا" وباش عاقت وبدات كدافع عليه وها اش قال وزير ل"كود" قبل ايام على هاد الشي

اليوم الاثنين 27 نونبر 2023 من المتوقع يتلاقى عزيز اخنوش رئيس الحكومة مع نقابات التعليم للحوار فالازمة اللي دارت بسباب النظام الاساسي الخاص بموظفي التربية الوطنية. هاد اللقاء كان علن عليه نهاية الاسبوع فالمجلس الحكومي واكدو فلقاء حزبي بفاس فالويكاند.
طبعا غادي يكون لقاء بلا نتائج ماشي حقاش الحوار غير مجدي اللا. حقاش النقابات ديال التعليم خرج ليها هاد الموضوع من يديها. اللي متحكم فيه هو تنسيقيات تابعين للعدل والاحسان ولشي وحدين اخرين. مطالبهم ماشي نقابية بل سياسية.
النقابات ضعفو ريوسهم براسهم ولعب النظام بشكل العام باش ينقص من قوتهم وباللخر دابا المواجهة ولات مع صحاب عبد السلام ياسين.
ماشي هادا هو الخطأ اللي كاين فتدبير هاد الموضوع. الخطأ القاتل فنظري هو تخلي الحكومة فبداية الاحتجاجات على دعم وزير التربية والتعليم شكيب بنموسى. حتى واحد ما دعمو باش بدات هاد الاحتجاجات. فديك الفترة سولات "كود" وزير فالحكومة على سبب هاد الموقف. كان ردو صادم ما عندو منطق. قال باللي بنموسى وزير ما كيشاركش باقي اعضاء الحكومة فالنقاشات فمواضيع اخرى. وزير ما كيدافع على حتى شي مشروع قانون ... ما كيبديش رأيو زعما. وباش حط مشروع القانون الاساسي لرجال التعليم وتناقش وتصادق عليه٬ هو عتابر القضية سالات وبقى ساكت.
طبيعي يبقى ساكت بنموسى. ياك المجلس الحكومي صادق عليه. يعني خاص كلشي يدافع عليه. ثم راه النقابات وافقات عليه قبل. المشكلة ماشي فبنموسى ولا فطبيعة شخصيتو. المشكلة فالحكومة. فاللول رجعات للاور وبقات تتفرج. من بعد حتى ناض الصداع وكان لقاء الاغلبية المشكلة للحكومة عاد بدا التحرك. كان قرار اتخداتو قيادة الاحزاب الثلاث المشكلة للاغلبية: الاحرار والبام والاستقلال٬ بالدفاع على هاد المشروع وبالدفاع على الوزير
لكن اللي وقع بين هاد الصمت ثم قرار التحرك كان الشارع شعل بصحاب التعليم. كانو ناس العدل والاحسان دارو تعبئة واعرة واها حقهم راهم كيديرو السياسة فكلشي. كانو خلطو التعليم بالحرب فغزة ودردروها حتى باصلاح مدونة الاسرة. دارو باكيدج باش يعارضو النظام ماشي النظام الاساسي للتعليم. شفتو هاداك ابو عبيدة ديالهم كيفاش اقتدى بديال حماس اللي دار عمل ارهابي ضد اسرائيل ف7 اكتوبر وبان فرحان ففيديو خرجو فالويكاند باش يعلن تحديه للدولة.
هادو ما بقاوش باغيين هاد القانون واسقاطو بداية للمطالبة باسقاط امور اخرى تتجه لاسقاط النظام. حقاش هادا هو هدف العدل والاحسان. التعليم غير مدرگين وراه. كيف الحرب فغزة. كيف اصلاح مدونة الاسرة.
دابا الحكومة كتخلص غباءها. تخليها على عضو منها. الغباء السياسي عطى كورات واعرين للعدل والاحسان يماركيهم. غير هو ما هاموش يماركي ضد الحكومة. باغي يماركي ضد النظام.