حتى حد ما تسوق لايت منا فماتش الوداد وبرشيد وخا دار فيها ودادي.. واللعابا: كنبغيو الناصيري وكنتمناو يخرج

ما ناسينش لاعب الوداد الرياضي ومكونات الحمرا رئيس النادي سعيد الناصيري فالظروف الصعيبة اللي كيدوز منها، بعدما قرر قاضي التحقيق بمحكمة الاستئناف فكازا التحقيق معه فحالة اعتقال بعكاشة بسبب قضية "اسكوبار الصحراء"، وهذا الشي تأكد فماتش الفريق ضد يوسفية برشيد اليوم السبت فالمحمدية ضمن البطولة الاحترافية، واخا شي وحدين اللي بعاد على الوداد وجاو للماتش دايرين فيها وداديين لترويج اسمهم للخلافة البريزيدون الناصيري.
وهذا الشي تأكد خلال ماتش الوداد وبرشيد، حيث واخا الفريق ربح بواحد لزيرو ولكن كانو اللعابا والطاقم التقني متأثرين بسبب شنو واقع لسعيد الناصيري رئيس الواك، وقال محمد مديحي مساعد مدرب الفريق فوزي البنزرتي فتصريح لموقع "كود" بعد نهاية المباراة: "كنتمناو الفرج لسعيد الناصيري.. السيد عطا بزاف للوداد وغيكون الفرج .. آخر مرة شفناه هي فاش كنا غاديين مسافرين لتنزانيا وكيوصي على الوداد وعلى اللاعبين وكنتمناو يرجع للفريق ديالو وكنا محتاجين له فالوداد".
وتكلم يحيى جبران كابيتان الوداد وقال: "اعتقال سعيد الناصري شي حاجة كتحز فالنفس هو الأب والأخ ديالنا الكبير وكنفتاقدوه خصوصا وأننا عشنا معها أوقات زوينة.. كان كيعطينا حب كبير واطمئنان وكنتمناو له الفرج وحنا والوداد محتاجين له".
وقال الشرقي البحري لاعب الوداد حتى هو: "سعيد الناصيري وصانا على الفريق وديما كان واقف معنا وفكاه الظروف وكنتمناو له السراح وهادشي صدمنا".
وكتجي تصريحات مكونات الوداد الرياضي من لاعبين وطاقم تقني باش تأكد ان سعيد الناصيري رئيس النادي ديما فبالهم ، وانهم مشغولين بالوضع ديالو وكيحبوه وعندهم امال كبيرة انه يخرج من الحبس فالقريب، وان حتى واحد ما يقدر ياخد بلاصتو عندهم، واخا محاولات البعض ومن بينهم هشام ايت منا الرئيس السابق لشباب المحمدية، اللي جا حضر ماتش الوداد ضد يوسفية برشيد فمحاولة لاستغلال الوضع والترويج لراسو كمرشح لرئاسة النادي.