اللي كيصلحو سعيد الناصيري رئيس الوداد الرياضي كيجي شي واحد فالمدربين اللي كيتعاقد معهم النادي يبدا يريب فيه، ومن بعد كل من الحسين عموتة والمهدي النفتي اللي تم الانفصال عليهم بسبب مشاكلهم الكثيرة مع الفريق، جات نوبت المدرب الحالي للفريق كارلوس كاريدو. ومن بعدما تدخل سعيد الناصيري قبل يومين لحل المشكل بين كارلوس كاريدو واللاعب محمد أوناجم، وقبل منها المشكل ديال نفس المدرب مع اللاعب رضا الجعدي، ها هو مشكل جديد خرج وهو البطل ديالو مرة أخرى ولكن هاد المرة ماشي مع شي واحد من اللاعبين، بل مع واحد من الركائز الأساسية والمهمة في الطاقم التقني ديال الحمرا. وكيتعلق الأمر بالمدرب المساعد عبد الإله صابر واللي قرر يبعد على الوداد خلال ماتش سيمبا، بسبب خلاف مع المدرب الإسباني كارلوس كاريدو على طريقة اللعب والاختيارات التقنية فالماتش ضد سيمبا، وهذا الخلاف بين الطرفين وصل إلى حد انسحاب صابر من الحصة التدريبية الأخيةر للوداد قبل الماتش حيث العلاقة ديالو مع كاريدو تشنجت بزاف لدرجة أن اللاعبين تدخلو باش يكالميو الجو. الوداد الرياضي ولو أنه تأهل إلى دومي فينال عصبة أبطال إفريقيا للمرة الخامسة على التوالي وهو إنجاز غير مسبوق للفرق المغربية، ولكن الفريق محتاج لعدد من الإصلاحات حيث هذا الشي بان واضح ضد سيمبا وباعتراف من المدرب كارلوس كاريدو بنفسو، الأمر اللي كيأكد أن المدرب المساعد عبد الإله صابر كان عندو الحق حيث مكانش راضي على اختيارات كاريدو لهذا الماتش. ومرة أخرى، كيلقى سعيد الناصيري رئيس الوداد الرياضي راسو مضطر يتدخل باش يصلح مشكل جديد تسبب فيه المدرب كارلوس كاريدو، وهاد المرة مع عبد الإله صابر، خصوصا وأن الأخير بان الدور الإيجابي اللي كيلعبو داخل الطاقم التقني للوداد ومع اللاعبين، وهذا الشي انعكس إيجابيا على الفريق ومستواه منذ التعيين ديالو، غير هو غتكون المهمة ما ساهلاش عند البريزيدون الناصيري هاد المرة، حيث وعلى حساب الأصداء من محيط تيران بنجلون العلاقة بين كاريدو وصابر خسرات بزاف.
