جوج مقرقبين اغتصابو امراة فعمرها 66 عام بالسوالم الطريفية .. وهادشي بسباب انتشار ترويج واستهلاك المخدرات على عينيك أبن عدي

تعرضات امراة في عمرها 66 عام بجماعة السوالم طريفية، في الساعات الأولى من صباح أمس الأحد، لعملية اغتصاب من طرف شي وحدين مقرقبين.
هاد الحادث وغيرو هو نتيجة ديال الفوضى والتسيب اللي كتعرفهم بزاف الدواوير في جماعة السوالم الطريفية، التابعة لنفوذ الدرك الملكي، حيت كتعرف ترويج واستهلاك كاع أنواع المخدرات بنهارا جهار بدون حسيب ولا رقيب.
وحسب ما أكدته مصادر "كود" فإن الضحية التي تبلغ من العمر 66 سنة، كانت غادا لخدمتها في الفلاحة، وتلقاو ليها جوج ديال الأشخاص في 6 ديال الصباح كانو تحت تأثير القرقوبي اللي كيتروج بكثرة فالمنطقة وتعداو عليها جنسيا، واغتصبوها وخلاوها في حالة سيئة تهزات بعدها للسبيطار وهي مغمى عليها.
هاد الجريمة هي نتيجة طبيعية ديال التسيب للي كيعرفو دوار السويلم، حينت واحد البارون باسط النفوذ ديالو فالمنطقة كا يبيع مكاع أنواع المخدرات من القرقوبي للبوفا للحشيش والكيف وحتى الكوكايين، وكا يتنقل بطموبيل رباعية الدفع، معروف في الخلايف بلقب "ولد الفاطمي"، كيتحرك بكل حرية دون أن تصله أيدي الدرك الملكي سواء من طرف مركز السوالم أو درك السوالم الطريفية، وهادشي ناتج على التسيب للي كاين فالسوالم.