الركراكي: الكوت ديفوار يستاهلو كاس افريقيا وما داوهاش بالزهر واشياء صغيرة دارت الفريق بينا وبينهم

أكد الناخب الوطني وليد الركراكي ان المنتخب الايفواري يستهل يربح كوب دافريك، وانهم نموذج زوين فالسوبر بالمسار اللي دارو فالبطولة، ورجعو ربحوها بعدما كانوا مقصيين وان ماشي الزهر اللي خلاهم يديرو الكاس ولكن أشياء اخرى.
وهضر الناخب الوطني وليد الركراكي وقال فحوار على قناة الرياضية: "تتويج الكوت ديفوار بكوب دافريك ماشي زهر بعدا ويستاهلوه، الكورة هي الحياة مرة مرة كطيح وكتنوض وهما عاشو 2 كوب دافريك فواحدة تقصاو ورجعو بالنية ديال كلشي وحنا ديما كنقولوها كيفاش فريق خسر ب4 لزيرو وتقصاو وكيفاش رجعو ربحوها والمونطال اللي كان عندهم باش جابو لاكوب".
وكمل الركراكي: "هاد المسابقة ماشي ساهلة، حيث تقدر تكون ماشي مزيان فالاول وتولي مزيان فالاخير وكاينين بزاف ديال ليديطاي وهما عرفو يمكن يلعبو بهذاك الإقصاء اللي كانوا شافوه وموتيفاو ريوسهم مع الجمهور ديالهم ومشات معهم الكورة ولاو منتخب آخر ولاو لاعبين اخرين وهزر المسؤولية وتبدلو ومشاو يجيبو لاكوب دافريك وهذا نموذج زوين فالسوبر، وملي كنشوفو حنا كيفاش تقصينا وهما كانوا إليميني وتسناونا حتى حنا أهلناهم باش يعيشو بطولة اخرى وهذا الشي كيبين ان الفوتبال كيتلعب على حوايج صغار، ولكن ماشي الزهر".