الركراكي: تبرزطت ملي اجتمعت مع لقجع.. عندنا رئيس جامعة كورة كبير واتفقنا نزيدو القدام باش نجيبو كوب دافريك الجاية

كشف الناخب الوطني وليد الركراكي، على شنو وقع فالاجتماع اللي دار معه رئيس الجامعة الملكية المغربية لكرة القدم، بعد الإقصاء من كاس أفريقيا الأخيرة، وكيفاش جا قرار تعزيز الثقة فيه وعلاش.
وهضر الناخب الوطني وليد الركراكي وقال فحوار مع قناة الرياضية: "دخلت للاجتماع مع رئيس الجامعة الملكية المغربية لكرة القدم مقلق ومبرزط حيث كيبقى هذا منتخب بلادك، كنقولها ملي عندك مدرب مغربي فالمنتخب ديما غيحس بها كثر من الأجنبي وديما غنبقى نقولها المغرب بلادي وكنت باغي نفرح الجمهور وانا عارف الضغط اللي كاين فهاد المنتخب وشنو كيتسناو الناس وكيفاش تقدر تفرحهم، داكشي علاش بقيت مقلق".
وقال الركراكيي: "طحت فرئيس جامعة الكورة، رئيس كبير وعندو فيزيون كبيرة وحتى هو ماشي شي واحد اللي غيفكر بسخونية الراس، گلسنا وكل نهار كنا كنگلسو وكنقلبو على شنو وقع وشنو كنا نديرو احسن وشنو هو المستقبل وكلشي وزعما قلبنا على قرارات اللي يخليونا نزيدو القدام وكلشي والخير هو اللي غيجي، حيث عندنا بلاد اللي منظم كوب دافريك، ونديرو احسن كاس افريقيا وتكون تاريخيّة، وعندنا كوب ديموند 2030 وعندنا بزاف ديال المشاريع وعندنا صورتنا للعالم.. شنو هو الميساح ملي المغربي كيطيح صافي يمشي بحالو ولا يوقف ؟ بل العكس الشعب كيشجعك وانت ترجع فمستواك وتخدم ونشوفو القدتم ونمشيو نجيبو هاد لاكوب دافريك".
وأكد الركراكي انه غتكون تغييرات فالطاقم التقني ديال المنتخب المغربي وحتى فاللاعبين، وهذا الشي بعد الفشل فكوب دافريك اللي فاتت والإقصاء من ثمن النهائي.
وقال: "يمكن غيكونو تغييرات فالطاقم التقني وفاللاعبين، وخاصني نشوف أنا بعدا شنو ما درتش مزيان، واش كنا حنا الصطاف فالمستوى ديالنا ولي ديطاي اللي ما درناش وشنو اللي نقدرو نبدلو فاللاعبين وفالصطاف".
وكمل وليد الركراكي: "دابا عندنا شهر قبل من مارس ومن بعد عندنا عام ونص باش نوجدو ونكونو فالموستوى ديال لاكوب دافريك 2025".