شباب السوالم 3 سنين فالقسم الأول بلا تيران وملعب التداريب كارثي وكيشكل خطر على اللاعبين (تصاور)

كتواصل معاناة أندية كرة القدم الوطنية مع أزمة التيرانات حيث أغلب الملاعب الكبيرة مسدودين للإصلاح استعدادا لكوب دافريك 2025 ومونديال 2030، ولكن كاين فريق اللي ما عندوش تيران ملي طلع للقسم الوطني الأول عام 2021، وكيتعلق الأمر بشباب السوالم.
شباب السوالم اللي ولاو كيدخلو الماتشات ديالهم فتيران البشير بالمحمدية، ما عندهمش حتى تيران لائق بالتداريب ديال الفريق، والبارح الثلاثاء، وخلال الحصة التدريبة لشباب السوالم عرفت حضور أعضاء المكتب المديري برئاسة بوشعيب بنشيخ باش يدعمو اللاعبين ويساندوهم بسبب الوضع اللي كيدوزو منو.
وفهاد الحصة التدريبية ضربو المسؤولين ديال النادي تصيورات فالتيران ديال التداريب، وهاد الصور وبدون ما يحسو عرات الواقع المؤلم اللي كيعيش فيه الفريق اللي كيتدرب فملعب دون المستوى والعشب ديالو ما يصلاحش يكون للتداريب، والأخطر من هذا يقدر يتسبب فإصابات للاعبين.
الوضع اللي كيعيشو فريق شباب السوالم كيطرح سؤال عريض على دور المسؤولين فالمدينة، وعلاش الفريق 3 سنين هادي ملي طلع للقسم الأول من البطولة وهو بلا تيران، لدرجة أنه كيمشي من السوالم يلعب فالمحمدية فكل ماتش كيبغي يدخلو، والأكثر من هذا حتى ملعب التداريب ما صالحش حتى للتمارين الرياضية.