أزمة أندية الكورة بسباب سدان التيرانات دخلت للبرلمان.. وكيفاش ملعب بحال الزاولي تصرفات عليه الفلوس العمومية وما صالحش يلعبو فيه الرجاء والوداد للي الخسائر ديالهم وصلات حتى لدابا ل3 المليار سنتيم

كتعيش الأندية المغربية وعلى راسها الرجاء والوداد والمغرب الفاسي واتحاد طنجة والجيش الملكي أزمة حقيقية بسباب سدان التيرانات الكبيرة فالمغرب باش تصلح استعدادا لتنظيم كأس إفريقيا 2025 وكأس العالم 2030، وهاد الإصلاحات اللي بدات دابا فعدد من تيرانات المغرب، فضحات بزاف من المسؤولين اللي خاص يتحاسبو على ملاعب تغلقت خلال تقلدهم للمسؤولية وتصرفت عليهم ملايير الدراهم من الميزانية ديال الدولة ومع ذلك ما بانش الإصلاح على هاد التيرانات اللي عاجزة عن استقبال الماتشات ديال القسم الأول من البطولة الاحترافية بحال تيران العربي الزاولي فعين السبع فكازا.
وكيعانيو هاد الأندية بزاف من جميع النواحي باش يلعبو الماتشات ديالهم وما لاقينش فين يلعبو، وهذا الشي خلا رئيس الرجاء الرياضي محمد بودريقة اللي هو نائب برلماني عن حزب التجمع الوطني للأحرار، يوجّه سؤال كتابي لشكيب بنموسى وزير التربية الوطنية والتعليم الأولي والرياضة على شنو هي التدابير والإجراءات المتخذة لتجاوز الوضعية الصعبة اللي كتعيشيها الأندية الرياضية لكرة القدم بسبب إغلاق مجموعة من الملاعب والمركبات الرياضية على الصعيد الوطني.
وحسب ما توصل به موقع "كود" من معلومات، فالخسائر ديال الأندية المغربية تقدر بالملايير بسبب إغلاق التيرانات، وغير الرجاء والوداد بجوج الخسائر ديالهم بسبب هاد الشي كثيرة بزاف وصلات دابا ل3 المليار سنتيم، وأن الرجاء بوحدهم كيخسرو بسبب إغلاق مركب محمد الخامس ما بين 100 و300 مليون سنتيم، وهذا الشي تكاليف الجمهور اللي قرر يقاطع حيث الفريق كيلعب برا كازا والقضية فيها عبء الديبلاصمون وتكاليف تنقل الفريق خارج الدار البيضاء وغيرها، وبالمقابل كتكون المداخيل هزيلة.
المشكل هنا ماشي هو هاج الشي بوحدو، حيث ودائما مع مثال الرجاء الوداد بحكم أن الفراقي بجوج هما الكبار فالمغرب من ناحية كل شي، فالواك والرجاء ما كرهوش يلعبو فكازا فالعربي الزاولي، وهذا التيران هو معنى حقيقي ديال العبث، حيث شحال من مرة وهو كيخضع لعمليات الإصلاح بلا حتى شي نتيجة، فالوقت اللي خاصو يصوفي القضية ملي كيتسد ستاد دونور ويلعبو فيه الرجاء والوداد، ولكن السلطات رفضت أنها تمنح ترخيص للرجاء يلعبو فيه حيث غير مؤهل، بسبب المرافق ديالو اللي حالتها كارثية، وهذا الشي كيحط المسؤولين فمقاطة عين السبع بالدار البيضاء أمام مسؤولية كبيرة كيتحملوها فهادشي اللي وصل له تيران العربي الزاولي، حيث هاد الملعب كل مرة كيتسد ويتعاود يتسد للإصلاح ومن الميزانية العمومية ولكن دون نتيجة.