عوض الدولة تسيفط أئمة للخارج باش تحصن الأمن الروحي للجالية المغربية راه خاص أولا تحصن المغاربة من تشدد الجالية وأفكار الجالية المشرقية وتحصن المغاربة من احتقار الذات قدام كل ماهو عربي وأجنبي

الدولة المغربية غادي تسيفط أئمة باش تحصن الأمن الروحي لمغاربة المهجر في رمضان، للأسف الجالية فات فيهم الفوت راه خاص الدولة تقاد أئمة هنا لتحصين المغاربة من عقيدة وأفكار وتشدد الجالية، راه الجالية من أسباب دخول التشدد والتطرف للمغرب ومن أسباب تقسيم مدينة طنجة لجوج طوائف سنة وشيعة، حتى ولات بني مكادة وبير الشعايري بحال بغداد، شي نهار تلقى بنادم مبايع الحشد الشعبي من الزنقة طناش، والجالية هي لي سيفطات الفلوس من برا لتمويل الجوامع والجماعات، وفين مكان شي نصاب شفار دار اللحية ومشا يجمع الفلوس من عند الجالية، وحاليا الجالية هوما لي كيجيونا في الصيف بذاك النقاب والحجاب الشرقي العجيب ديالهم، والجالية هوما لي منباهرين بأي واحد عربي واخا يكون كيسرح المعيز في العلا وحافظ غير الحمدو يربي اللحية ويجي يدير عليهم داعية، ويقدسوه ويعتابروه حسن منهم، راه حنا في المغرب خاص نتحصنو منهم أما هوما فات فيهم الفوت إلا من رحم ربي.
الدولة المغربية خاص تحصن الأمن الروحي والعقائدي والوطني للمغاربة ومايبقاوش حالين فمهم لكل ماهو شرقي، وكتلقى واحد يمني حياتو كلها مدوزها مبوق بالقات ولابس كاشكول عوض السروال ويجي للمغرب وغير يشكر البلاد يحلوهاليه بعض المغاربة على ورقة حتى يولي نجم وسيد عليهم وهو يعلمهم على بلادهم، وطبعا ينسب أي حاجة للعرب أو للأندلس كأن ماشي المغاربة هوما لي فتحوا الأندلس وداو ثقافتهم ومعمارهم ومعرفتهم وحضارتهم لتم، ومن بعد استرجعوها ولو بعد حين وبظروف مأساوية شوية، راه كاين واحد احتقار الذات قدام العرب والأجانب عموما مزروع عند المغاربة عجيب وغير مفهوم، بالنظر لأننا أمة عظيمة كنا مركز إمبراطوريات حكمت المنطقة كاملة، خرجات من عندنا وكانت وأسسوها جدودنا.
خاص مراكز للتفكير كيفاش يسترجعوا المغاربة اعتزازهم بذاتهم قدام البراني، راه غير معقول هاد الانبطاح التام للأجنبي أيا كان، وخصوصا الانبطاح الديني والنضالي ولي سبابوا طبعا الإسلاميين واليساريين، أما المغربي العاقل يمكن يستقبل ويرحب برجل واحد في العالم وهو القائد دونالد ترامب رائد السلام العالمي، أما واحد عروبي في مصر أو لاجئ من شي قنت أو سائح عربي فين مابانت ليه شي حجرة يقوليك هادي من آثار الأندلسيين كأن المغاربة لا أثر لهم، والمغاربة هم الأندلسيون الحقيقيون والآخرون مجرد علوج عندهم، راه خاص الدولة تفيق لهادشي وعوض تحصن الجالية في رمضان تحصن المغاربة منهم.