المرأة حقا ضحية للمجتمع والدين والأعراف والقيود الإجتماعية لي رابطها قرون هادي، ولكن ماشي لدرجة الى طمعات في فلوس شي سعودي ونعسات معاه ومن بعد رجع فلوسو نسميو السعودي حقير بوحدو ومنسميوهاش حتى هي طماعة

هاد الأيام قريت واحد جوج أخبار في موقع كود غراب بزاف وغير منطقيين، الخبر اللول ديال اعتقال شي واحد كانت كتسيفط ليه شي مغربية فيديوات جنسية ديالها من بعد ماواعدها بالزواج وناض حطهم في مواقع البورنو، وخبر آخر ديال سعودي عندو خمسين عام كيقصد غير بنات تسعطاش لعام ( لاحظو أن السيد خدام في السليم) وحسب الخبر حتى هو كيطمعهم بالزواج ويخطبهم ويبدى يرسل الفلوس لحسابهم وملي يشبع من الحلوة يطالب برزقو، والعنوان ديال الخبر كان مكتوب فيه سعودي حقير كينصب على مغربيات، زعمة هذا راه دفاع على عليهم، وباش يبان السعودي هو لي حقير ومجرم وخطير، أما البنات والأسر ديالهم لي الفلوس داخلة للكونط والناس زاهية وفرحانة هانية، زعمة عادية عندهم بنتهم مخدمات ماردمات مادربات تمارة ماعرقات عليهم، حتى كيتدوز الفلوس للحساب وهانتا عيش أكانيش.
المشكل هو بحال هاد المواقف لي زعمة يفترض أصاحبها انهم كيدافعو على المرأة، راه في الواقع كيهينوها وكيعتابروها بحال الى فاقدة للأهلية ومعندهاش دماغ باش تفكر وتعرف الصح من الغلط وماشي حرة الإرادة وفاهمة شنو كتخربق، وحدة مصورة فيديوات جنسية ومسيفطاهم بإرادتها وهي ماشي طفلة او قاصر، إنسانة راشدة بكامل قواها العقلية صورات لراسها فيديو جنسي وسيفطاتو في الأنترنيت، اذن باينة راه غادي يخرج ولو بالخطأ أو بحسن نية، والى شي حد خرجو فراه خاص يتعاقب طبعا، غير هو ماخاصش يتم التعاطي معاه بحال الى صورها صحة وكان كينشر الفيديوات ديالها باش يتمعش منهم، السيد كذب على البنت وصافي وقبل مايكذب عليها ويواعدها بالزواج، راه كذب عليها المجتمع وواليديها وعائلتها وأسرتها كذبة عمرها قرون وقرون وهو أن الزواج مهم للمرة وخاص تدبر راجل بأي وسيلة تذكر واخا تسيفط ليه تصويرة الرحم ديالها بالأشعة السينية.
المرأة المغربية ماشي كائن فضائي ولا داك المخلوق الضعيف المحتاج للحماية ومعندو لا أهلية عقلية ولا معرفية، راه بحالها بحال أي واحد مرة تكون جانية ومرة الضحية، وملي تكون الضحية مكتعنيش أنها حيت معندها عقل عليها وقعات ضحية للخداع، راه مقابل دوك البنات الطماعات وعائلاتهم لي بغاو يبيعو بنتهم مقابل فلوس باردة وفاللخر تنصب عليهم، كان ألاف الرجال لي نصبو عليهم بنات حتى هوما وممحتاجينش يتسماو حقيرات بل فقط نصابات بحالهم بحال النصابة الرجال، ومقابل وحدة صورات فيديو جنسي لراسها وسيفطاتو لواحد حطو فالموقع الأزرق، كاين الملايين ديال الرجال لي مصورينهم بنات كيسلخو الحنش قبالت الكاميرة وخرجو هاد الفيديوات، التحامل لطرف على حساب الآخر مكيخدم حتى شي قضية، المرأة حقا ضحية للمجتمع والدين والأعراف والقيود الإجتماعية لي رابطها قرون هادي، ولكن ماشي لدرجة الى طمعات في فلوس شي سعودي ونعسات معاه ومن بعد رجع فلوسو نسميو السعودي حقير بوحدو ومنسميوهاش حتى هي طماعة.