راه ماشي مشروط علينا ندافعو على فلسطين و اطفال فلسطين و نساء فلسطين !تاحنا عندنا أطفال الحجارة غي فالخرجة دكازا كايجمعو الميكة فزبالة ميريكان!

بعيدا عن ديك الهضرة ديال الانسانية و الصمود و حنا كلنا خوت ! أنا كانشوف اليوم بيلا قمة مسالية القب إن لم نقل مسالية "المؤخرة"! هي تكون مغربي حازق، و مقودة عليك من جميع النواحي و هاكاك كاتفكر ففلسطين و أطفال فلسطين و نساء فلسطين و هاز ليهم الدبيلة و كايبقاو فيك و كاين لي كايمشي بعيد كاع و كايناضل بوجهو احمر من اجل فلسطين! كاتلقاه داير تصويرة "غزة "فوطو دو بروفيل ففايسبوك ! و كايهضر على فلسطين و شهداء فلسطين و زناقي فلسطين فحالا كايهضر على دوارهم بواحد الحرقة مادايراش !
شنو العلاقة بينا و بين فلسطين ؟ آ شنو كانصورو و لا صورنا من فلسطين ؟إلا جينا نشوفو راه مابينا و بينهم تا علاقة ، ماكايهضرو فحالنا !ماكايفهمو هضرتنا! ماكاياكلو فحالنا ! ماعندنا شي قاسم مشترك معاهم(من غير دين) والو ! دولة بعيدة علينا بكيلومترات من نهار حلينا عينيها و هوما مقاتلين ! من نهار عقلنا على راسنا و حنا كانسمعو " تل أبيب " حيفا " "خان يونس " "الخليل " الإنتفاضة … أطفال الحجارة ! خرجنا على ودهم فالمظاهرات ! جمعنا ليهم فالفلوس سيفطناليهم الامدادات … اي و من بعد ؟ كل نهار كايتعاود نفس الفيلم و كل عام كاتجي شي مناسبة انتفاظة ! مقاومة ! مجزرة … كل عام الفلسطينين كايديرو شي show باش يحشدو الدعم و يتسيفطو ليهم الأمدادات و الفلوس و الطيارات عامرين بالدوا و الخناشي د الفورص ! حتى مع الوقت ولاو الفلسطيين داخلين معانا جنب ! نهار اليوم العالمي للمرأة خاصنا ضروري ندويو على المرأة الفلسطينية ! نهار عيد الطفل خاصنا ضروري نخشيو الطفل الفلسطيني ! فالمدارس ضروري تكتب شي إنشاء فحياتك على فلسطين … المغربي ملي كايحل عينيه و هو كايعلف فالأخبار على فلسطين و على القضية الفلسطينية حتى كايولي يجيب ليه راسو راه كايتسال النص فقطاع غزة و الضفة الغربية !
و الطامة الكبرى هي واحد الفئة ديال المغاربة لي تمارس عليهم واحد l'endoctrinement مدة طويلة من الزمن لدرجة ولاو كايحسو براسهم مسؤولين على فلسطين و اطفال فلسطين و عيالات فلسطين،كايولي المغربي كايدافع على فلسطين اكثر من الفلسطيني براسو لي شحال من واحد فيهم اليوم راه طالب اللجوء فسويسرا و لا قطر و لا الشيلي و لا ميريكان عايش مع راسو الحياة، و بعرور عندنا مقيد فدار الشباب "ولاد عكو "مسيكين الكول ديال قويميجتو كاشف بالشمش فراس مالو كاشكول واحد ديال فلسطين و قالك تاهوا خارج كاينبح قرجوطتو تجرحات " دم عربي وااااحد ! قدس عربي وااااحد" منين قدس عربي واحد ؟ منين دم عربي واحد ؟ هاد النوع ديال المغاربة لي كايتعاملو مع فلسطين على اساس هوما زعما راه ماخاصهم حتى شي خير، كايمارسو واحد النوع ديال "الترف " النضالي، فحالا هوما لاباس عليهم و كايدافعو على خوتهم الفلسطيينين ! اوه سي مينيو ! و لكن مايمكنش تمارس هاد الترف النضالي و نتا بكرك مقودة عليك كإنسان و كمواطن فبلادك ! مايمكنش دافع على اطفال فلسطين و تحط تصاورهم ففايسبوك و هوما كايشيرو بالحجر على دبابة اسرائيلية و دير حداها "كم جيم للأطفال الشجعان؟" و نتا عندك اطفال فبلادك فأنفكو كايموتو بالجوع و البرد و القهرة ! مايمكنش للمغربي يناضل من أجل "المرأة الفليسطينية رمز الحرية و الشجاعة" و حنا عندنا العيالات فالجبال مازال كايهزو شارجما ديال الخشب و العواد فوق ظهورهم باش يجمعو الحطب للعافية …
حنا بلا حرب بلا اسرائيل مقودة علينا و على ولادنا و عيالاتنا و تاحنا راه عندنا شي مناظر فين يبانو اطفال الحجارة خرجو غي لعين الدياب مع الثلاتة د الصباح تشوفو أطفال الحجارة كايبيعو كلينيكس !
المغربي مافراسوش بيلا 80 فلميا ديال المعاملات التجارية ديال الفلسطينين كايديروها مع اسرائيل يعني واكلين معاهم الخبز، و أنه بزاف ديال الفلسطينين كايخدمو فإسرائيل مع إسرائليين ، و كاين كاع لي مناسبين و مزوجين …و بلي اليوم اعضاء الحكومة الفلسطينية ولادهم من كبار المستثمرين فالخليج و الشرق الأوسط ! و أنه الريوس الكبيرة ديال حماس عايشة وسط القصورة فقطر كاضرب فالماعز مشوي و نص جمل مشوط على الفاخر مع الروز !
ايوا خويا المناضل المروكي و نتا مالك جوج د الباشار مضاربين بيناتهم مرا يتصالحو مرا يتقامشو و نتا؟ آش دخل حمارك للفروسية ؟