واش هاد الشي فراس الطالبي العلمي؟ غضب فالبرلمان بسباب عدم توصل الموظفين بالخلاص ديالهم

علمت "گود" من مصادر مطلعة، أن حالة من الغضب كاينة فصفوف موظفي مجلس النواب بسباب التخبط فالتسيير اللي كتعيشو هاد المؤسسة.
وقالت المصادر أن حالة الغضب اللي كاينة فصفوف الموظفين كترجع لعدم توصلهم بأجورهم الشهرية إسوة بباقي الموظفين فگاع القطاعات، ولاسيما موظفي مجلس المستشارين اللي تخلصوا نهار الخميس اللي فات.
المصادر اللي هدرات مع "گود"، قالت بللي سباب عدم توصلهم بأجورهم ما معروفش وتا حد ما باغي يجاوب أو يوضح للمعنيين بالأمر، خاصة وأن هاد الموظفين عندهم التزامات بحالهم بحال گاع المغاربة، مضيفة أن مسؤولية هادشي اللي واقع كيتحملها كل من مدير الموارد البشرية والخازن اللي كل واحد فيهم كيلوح المسؤولية على لاخور.
دابا هاد التأخير اللي حاصل فتأدية أجور هاد الفئة كيجي فواحد المرحلة صعيبة اللي كيعيشها مجلس النواب بسباب الانشغالات بالمرحلة الانتقالية قبل التجديد النصفي لجميع هياكل مجلس النواب.
المصادر تساءلت حول واش رئيس مجلس النواب راشيد الطالبي العلمي فراسو هادي الشي أو لا؟ لأن هاد التأخير اللي كاين وغياب الجواب كيضر بهاد المؤسسة وكيخليها تكون خارقة القانون فالوقت اللي هي مسؤولة على تشريع القوانين.