مصدر من داخل مجلس جامعة سطات ل "گود": الرئيس مكرم حالف حتى يعين صاحبو مدير مركز الدكتوراه يا عميد FST يا مدير معهد علوم الصحة ومكلاسيه رقم 1 فيهم بجوج

رئيس جامعة الحسن الأول فسطات عبد اللطيف مكرم، سوق لخطاب الإصلاح فالبداية وكيغازل الصحافة فگاع لقاءاتو.. ولكن مصادر كتقول انه من الممكن يكون عندو خطط باش يحكم فدواليب الجامعة واخا كاينة تحقيقات لي كان فيها نائب رئيس فذاك الشي ديال البيع والشرا فالماستر. وممكن تكون دابا بدات مرحلة اللعب في المناصب بحال لي دارت الرئيسة لي قبلو والرئيس قبلها لي بجوجهم دابا موضوع تحقيقات ديال الفرقة الوطنية.
مصادر "گود" كشفات التسريبات ديال ترتيب كونكور كلية العلوم والتقنيات FST ولي جاو فيها جوج اللولين هما مدير مركز الدكتوراه (ب.ب) الصاحب المقرب بزاف من الرئيس، والثاني كيف أكد المصدر هو مالك لشركة براس مال كبير مكيجيش گاع للكلية لانه مقابل الشركة والثالث هو العميد لي فيها دابا.
الخبار لي جابتها "گود" تأكدات فمجلس الجامعة لي تعقد الجمعة بمقر رئاسة الجامعة.. والصدمة الجديدة لي تلقاوها أعضاء المجلس هي أن هاد الجوج تكلاساو عاود ثاني مدير مركز الدكتوراه ومول الشركة على التوالي الاول والثاني فكونكور معهد علوم الصحة.. وبان أن تقسيم هاد الكيكة ديال المناصب غادي يدي جامعة سطات غير للهاوية وهي مزال گاعما برات من فضايح الجنس مقابل النقط والسرقة العلمية والفضائح المالية..