قدر المنتخب الوطني المغرب لكرة القدم النسوية يحقق رباح مهم على المنتخب الزامبي اليوم الجمعة فزامبيا، فماتش الألي ديال الدور الرابع والأخير المؤهل لأولمبياد باريس 2024، ودارو اللبؤات الرِّجل الاولى فالأولمبياد في انتظار ماتش الروتور فالمغرب الثلاثاء الجاي. وسالا الماتش بين المنتخب الوطني المغربي ومنتخب زامبيا برباح اللبؤات بنتيجة 2 لواحد، وكان الماتش قاصح وحتى التحكيم ماكانش مزيان على المنتخبين بجوج، ومع البدية ديال المباراة احتجو الزامبيات وطالبو ببيلانتي بداعي ان الكورة ضربت يد وحدة من اللاعبات المغربيات، ومن بعدها وفالدقيقة 35 عطات الحكمة بيلانتي خيالي لزامبيا ولكن الگولة المغربية خديجة الرميشي تصدت لها، أمام صدمة اللاعبة الزامبية اللي ضربت البيلانتي بريسكا جوايا، هي ولاعبات المنتخب الزامبي المصدومات فالوقت اللي عطات الرميشي الثقة لراسها ولصحباتها المغربيات، مع العلم أن ابتسام الجريدي ضعيت هدف حقيقي بعدما انفردت بالگولة الزامبية فالدقيقة 42، ولكن ضربت الكورة بعيد على الشبكة قبل ما تضرب زينب الرضواني هدف واعر بعدما دريبلات المدافعات الزامبيات وصيفطات الكورة نيشان للمرمى فالدقيقة الأخيرة من الشوط الاول. وفالشوط الثاني خرجو اللاعبات الزامبيات يقلبو على التعادل، وخلاو فظهرهم بزاف ديال المساحات ولكن اللاعبات المغربيات ما استغلوش الفرص الحقيقية اللي جاتهم وضيعو 2 أهداف على الاقل قدام شبكة زامبيا، وخصوصا إيمان سعود وابتسام الجرايدي اللي زگلو ثلاثة انفرادات حقيقيين بسبب التسرع وقلة التركيز، وهذا الشي استغلوه لاعبات منتخب زامبيا، اللي ضربو هدف فالدقيقة 70 ولكن حيداتو الحكمة بداعي التسلل وعرف احتجاج من الزامبيات، ومن وراها قدر منتخب زامبيا وبعد الضغط اللي دار يرجع فالماتش وماركا هدف التعادل فالدقيقة 80 برأسية لوشوكو مويبا، وضيع المنتخب المغربي من وراها فرصة لتسجيل الهدف الثاني بسبب التركيز ولكن روزيلا قدرت تخطف هدف الرباح فالدقيقة الأخيرة بعد أسيست ديال فاطمة تگناوت اللي تلاعبت بالدفاع الزامبي وعطاتها الباس وهي خرجت من وسط 2 مدافعات زامبيات وضربت الكورة للشبكة.
