فهاد الوقت بالضبط بلادنا محتاجة لصحافيين بحال علي لمرابط . مؤسس "دومان" تعرض بزاف للظلم من صحابو فالحرفة وما عمرو باع وشرا فبلادو او فمبادؤو وبقى علي كيف هو هادي عشرين عام

نايضة هاد ليام فالصحافة. كاينة مطالب من جمعيات مهنية باش المجلس الوطني للصحافة ما يبقاش كاع بالتصويت. فكرة بعض رؤساء هاد الجمعيات المهنية "فشلنا نديرو مجلس. فشلنا نديرو التنظيم الذاتي. قلبناها انتقام ذاتي وتدمير ذاتي لقطاع اصلا كيعيش الهشاشة. اليوم بغينا حكماء ديال بصاح. اعلاميون ما عندهم حتى شي ارتباط. ما هم اليوم صحافيين ولا ناشرين. بغينا ناس بعقلهم نحتاكمو ليهم".
صوت الحكمة هادا مزيان يسمع ليه الواحد. من بعد راه القرار بيد صحاب المهنة من صحافيين وناشرين. هاد الصوت اللي كيهدر ما كيستحضرش غير اش واقع فالمجلس الوطني اللا. كيشوف اش واقع فالصحافة.
صحافتنا فقدات كثير من الاصوات. هاد الشي اثر عليها وعلى جودتها. فقدات بوبكر الجامعي وصدقو فالدفاع على مبادؤو بحرقة. فقدات احمد رضى بنشمسي وافكارو الحالمة احيانا ببناء مجتمع حداثي يخرج المغرب من الظلمات للنور. فقدات صوت علي لمرابط الصحافي المتميز اللي كيشبه الدونكيشوتي بطل رواية ثيرفانتيس الشهيرة.
حنا محتاجين اكثر لصحافي ذكي وفنفس الوقت صادق بحال لمرابط. ما عمرو تاجر بشي قضية ولا باع وشرا مع شي حد. تلاقى مع كبار هاد لبلاد واكيد تعرضات عليه امكانيات باش يستمر ويطور مشروعو مقابل تغيير خط تحريرو.
اللي كيعرف علي لمرابط هادي عشرين عام او اكثر غادي يبان ليه باللي ما عمرو تغير. ما عمرو نافق ما عمرو هادن شي حد. حتى هادوك اللي اعتاقدو باللي قولبوه٬ حقاش الصحافي صادق ويقدر يثيق فصحابو وهادو يقدرو يستغلوه٬ باش يحس بيهم كينوض ليهم.
لمرابط من الصحافيين للي تعرض لهجوم كبير من اولاد الحرفة من زملاؤو. من خوتو فالصحافة. هاد الشي علاش كيفسر فيديوات ديالو هاد ليام.
بلادنا محتاجة لعلي. لصحافة علي. لصحافة بنشمسي. لصحافة الجامعي. لهاد التعدد والتنوع بالاضافة الى ما كاين هنا فالبلاد. واضح فقناعاتو. فمواقفو السياسية. بحال هاد النوع واخا تختالف معاه ما يمكن الا تحتارمو
هادي بلاد محتاجة لكل اصواتها. اصواتنا جميعا. بلا هاد الاصوات فالصحافة فالسياسة فالنقابات فالمجتمع المدني فالثقافة فالفن فالرياضة.... ما يمكنش نمشيو بعيد. ماشي ديك الاصوات اللي خرجات من المغرب وقلباتها بيع وشرا وتخصص فالتهجم على لبلاد. هادوك انتهازيين غاديين يبقاو ديما يحتاقرو ريوسهم قبل ما يحتاقروهم لمغاربة.
عندنا امكانيات كثيرة عندنا فرص كبيرة لكن خاصنا نقبلو هاد الاصوات. اصوات بحال صوت علي لمرابط