هواية. شكون اللي ورط الملك فهاد التواصل لعوج فقضية الحساب البنكي السويسري. فاللول تهديد وتهميش للصحافيين وفالاخير بيان اللي ما غاديش يغير شي حاجة. شوفو ملك الاردن خرج راسو بالجبهة

شكون اللي كيدير التواصل فالقصر وتكلف بقضية الحساب البنكي للملك محمد السادس في فرع البنك البريطاني "اش اس بي سي" فرع جنيف السويسرية اللي خرجاتو لوموند. هادا خرج على صورة الملك وطبعا على صورة المغرب. النهار الاول راسلات "لوموند" القصر الملكي والمحامي هشام الناصري وعوض يتلقاو جواب على حساب باسم الملك في الفترة الممتدة ما بين 2006 و2007 وبالحساب "محمد السادس رقم 5090190103 اللي فيه 7.9 مليون اورو٬ هددوهم وبداو كيعطيو تبربرات ماشاداش كي قضية راه وراها الامير مولاي هشام وصحابو.
لوموند كاع بتاريخها وتحقيق كيشمل 100 الف حساب وشارك فيه مئات الصحافيين من اكثر من 45 دولة غادي يكون كيحركهم الامير. ما شاداش كاع.
المهم خرج المقال ديال لوموند وكلشي الصحف والمجلات والقنوات التلفزيونية وحتى الاذاعات الفرنسية بالخصوص ذكرت بشكل مباشر حساب الملك وكان كل مرة مقرون باللي محاميه هدد الصحافيين بالمتابعة القضائية. صورة خايبة بزاف خاصة انها تزامنت مع بدء زيارة الملك لفرنسا ولقائه بهولاند بعد عودة الدفء الى العلاقات.
لاحظو الطريقة التي تبعها ملك الاردن. السيد عندو 8 المرات اكثر من الملك قرابة 40 مليون اورو فنفس البنك وباش سولوه فلوموند كال ليهم راه فلوس كتخدم بهم الدولة الاردنية. الجواب ما غاديش يقنع شي حد ولكن فالمقال داروه والنتيجة ملك الاردن الملك عبد الله ما تسوقوش ليه فوسائل الاعلام لانه ما مشاش كيواجههم ويهددهم بالمتابعة القضائية. هاد الشي كلو فمقال لوموند كيهدر على ان الهولدينك الملكي "اونا" اللي دابا اسمو "اس ان اي" ربح وهاد لفلوس اللي فلحساب راها ارباح ديال الملك من مشاريعو يعني ما عندها علاقة بفلوس لا الدولة ولا الشعب. فلوسو هما سولو غير على كيفاش خرجو وصافي. اما ملك الاردن ما كاينش هاد المعطى كاع.
بعد ما ناضت القيامة وظهرات صورة سلبية للمغرب فهاد القضية عاد ناضو لفهايمية فالتواصل وهاد الشي جا متأخر بزاف بزاف٬ رد على ما كتبته "لوموند" ونشر يوم امس في خانة ما كتقراش وما داهاش فيها الناس كيف ما داوها النهار الاول فالمقال. الرسالة موجهة للداخل اكثر من الخارج ولكن صورة الخارج راها مهمة بزاف بزاف. الملك قال في الرسالة الن"ان المبالغ التي يملكها في حساب مصرفي في اتش اس بي سي الذي كشفه مقالكم حولت بشفافية تامة بعلم من السلطات النقدية المغربية وبعد موافقة رسمية ومسبقة من مكتب الصرف كما تنص القوانين المطبقة في المغرب".
واضاف "بالتالي تم فتح هذا الحساب المصرفي في اطار القواعد الضريبية والقانونية المعمول بها".
شوفو دابا حتى قصاصة وكالة الانباء الفرنسية فهاد الموضوع كيف كانت: كالت بالمعطيات اللي جات فالرسالة وذكرت بالمقال "في عددها الصادر في العاشر فبراير نشرت الصحيفة الفرنسية مقالا بعنوان "" اكد ان العاهل المغربي فتح حسابا في اتش اس بي سي في جنيف في 2006 في حين انه يحظر على المغربيين المقيمين في المغرب امتلاك حسابات مصرفية في الخارج الا في حال الحصول على استثناء من مكتب الصرف.
"وقالت الصحيفة انه تم اخفاء هوية الملك وراء كلمة سر داخلية. وبين خريف 2006 و31 مارس 2007 الفترة التي تمكنت لوموند من الاطلاع عليها فان المبلغ الاجمالي في هذا الحساب بلغ 7,9 مليون يورو.
ثم تحدثت عن رد الملك الذي اكد "انه نظرا لانه ليس مقيما ضريبيا في فرنسا باي صورة من الصور وانه يسدد كافة متوجباته الضريبية في المغرب فلا يمكن اعتباره بين رؤساء الدول المتهربين من دفع الضرائب".
دابا علاش هاد الهواية كلها علاش ما يكونش هاد هو الرد النهار الاول وكان الملك غادي يخرج رابح وصورتو ما تمسش لا فالاعلام الفرنسي ولا فالاعلام الغربي. وشوفو على هواية